گود سبور//
فالوقت اللي كانو المغاربة كايتسناو أن الناخب الوطني محمد وهبي، غادي يكون منطقي فگاع الاختيارات ديالو بخصوص لائحة المنتخب الوطني المغربي المشارك فكأس العالم 2026، قرر يدير حتى هو بحال الناخب الوطني السابق وليد الركراكي، ويخلق الجدل فلاليست قبل المونديال.
أكبر نقطة مثيرة للجدل فاللائحة ديال محمد وهبي للمونديال، هي ديال منير المحمدي الگول ديال نهضة بركان، اللي مدة طويلة وهو گالس بسبب الإصابة والعملية اللي كان دار من ورا كأس أفريقيا 2025، ولكن وهبي اختارو فاللائحة ديال المونديال وزكّاه مرة اخرى كحارس ثاني من ورا ياسين بونو، وقال فالندوة الصحافية اإن منير المحمدي مول 37 عام، كايحبس وأنه كان لاعب فالماتش الودي ضد بوروندي اليوم الثلاثاء.
اختيار منير المحمدي فلاليست دالمونديال كايطرح علامات استفهام كبيرة، واخا المبررات اللي عطى محمد وهبي، ولكن راه المتتبعين للاعبين المنتخب عارفين أن المحمدي غايبة عليه التنافسية، وما كايستاهلش يكون هو الحارس الثاني د المنتخب الوطني المغربي، وتفضيلو على رضا التگناوتي الگول الثالث ومهدي لحرار اللي قرر يديه وهبي ريزيرف، هو قرار غريب بزاف، وغادي يخلي القيل والقال، والمشكل أن هاد جوج گوال احسن فالتنافسية والمردودية من المحمدي، سوا التگناوتي اللي تألق مع ليفار فالشومبيونزليگ وداهم للفينال، او لحرار اللي داير موسم كبير مع الرجا فالبطولة.
زائد أن محمد وهبي كان ديما كايهضر على ضرورة التشبيب فالمنتخب الاول ملي جا، وكلشي كان معول على أن يانيس بنشاوش الگول ديال موناكو الفرنسي والمنتخب المغربي أقل من 20 عام أبطال العالم مع وهبي نيت، ممكن يكون فلاليست او على الأقل غير ريزيرف، باش ياخد التجربة ويكون من العناصر المعول عليها إلى جانب لحرار فمونديال 2030.
إيوا هاد الاختيار المثير للجدل د منير المحمدي اللي عيط له وليد الركراكي لكأس إفريقيا 2025، واخا ما كانتش عندو التنافسية وزاد دابا عيط عليه محمد وهبي للمونديال، واخا ما كايلعبش هادي كثر من 6، كايطرح سؤال كبير وهو واش إلى اعتزل غادي نطلبوهم يرجع يلعب ونعيطو له المنتخب الوطني؟ فالوقت اللي المفروض فيه يكون المنتخب ديال اللاعبين للي جاهزين واللي قادرين يعطيو الإضافة.