تفتحات مدينة الملاهي فكوريا الجنوبية خاصة بروبوتات كيشطحو ويديرو ديفيلي

كود -وكالات //

فمدينة سيول فكوريا الجنوبية، تفتحات واحد البلاصة سميتها “غالاكسي روبوت بارك”،  أول مدينة ملاهي خاصة بالروبوتات فالعالم ، فهاد البلاصة، الروبوتات  كيغنيو، كيرقصو، وكيقدمو عروض بحال نجوم الكيبوب.

فالعرض الافتتاحي، طلعو أربعة ديال الروبوتات صغار  وبداو كيشطحو على أغاني ديال نجم الكيبوب G-Dragon، الحركات ديالهم كانت متناسقة ،اليدين كيتحركو، الرجلين كيدوزو الخطوات بإيقاع، وحتى الشعر واللباس كيتمايل مع الموسيقى وسط العرض،
هاد المشروع دايراه شركة Galaxy Corporation، وهي شركة كتخلط بين الترفيه والتكنولوجيا. الشركة حتى هي اللي كتسير أعمال Taemin والممثل Song Kang-ho المعروف بفيلم Parasite.

الرئيس ديال الشركة، تشوي يونغ هو، قال بلي الخطة ديالهم هي يديرو ما بين 3 حتى لـ6 حفلات ديال الكيبوب كل نهار، يعني أكثر من ألف عرض فالعام، وحتى الروبوتات غادي يديوهم فـ“تور” عالمي مع آخر العام.

الشركة ناوية دير أول “ديفيلي” ديال الأزياء الخاصة بالروبوتات فالعالم، وغادي تطلق ماركة ديال الملابس للروبوتات، ولكن ماعطاو تفاصيل كثيرة على الفكرة،
ومن بين الأفكار اللي باغيين يطبقوها، أنهم يرسلو روبوتات كتغني الكيبوب حتى للبلايص اللي الفنانين الحقيقيين ما يقدروش يمشيو ليها، بحال مناطق الحروب حيت أي رقصة كتتبرمج فروبوت واحد، تقدر جميع الروبوتات فالعالم تتعلمها وتقدم نفس العرض فنفس الوقت.

إقرأ الخبر من مصدره