كود -كازا //
فـ 2 يونيو 2026، غادي يستاضف المسرح الوطني محمد الخامس فالرباط واحد السهرة استثنائية، حيث لأول مرة فالتاريخ ديالها غادي دير فرقة البالي الوطنية البولندية عرض فالمغرب، هاد الفرقة الكبيرة، اللي كتبع الأوبرا الوطنية فوارسو، جاية ببرنامج كيجمع بين الموسيقى الراقية ديال فريدريك شوبان والأجواء الدرامية ديال فويتشخ كيلار. الحفل من تنظيم السفارة البولونية، وكيتعتابر حدث ثقافي كبير بين الرباط ووارسو.
الفرقة فيها تقريباً 80 راقص وراقصة، ومعروفة عالمياً حيث كتخلط بين الباليه الكلاسيكي والرقص العصري. دازت من جولات فـ أمريكا، كندا، الصين، روسيا والإمارات، ودابا جا الدور على المغرب باش يكون آخر محطة فالجولة الصيفية ديالهم.
البرنامج مقسوم لجوج أجزاء مختلفين بزاف. الجزء الأول سميتو “ششش…” من تصميم إدوارد كلوغ، وكيعتمد على موسيقى شوبان فجو هادئ وحميمي، كيهضر على العلاقات العاطفية والكلام اللي ما كيتقالش، العرض بسيط من ناحية الديكور، ولكن كيعطي مساحة كبيرة للجسد والتعبير بالحركة.
أما الجزء الثاني “كونشيرتو كيلار”، من تصميم كريستوف باستور، فكيجي بطاقة قوية ومشاهد جماعية كبيرة على موسيقى كيلار، المعروف بالموسيقى التصويرية ديال أفلام بحال دراكولا وعازف البيانو، العرض فيه مزيج بين الحزن السلافي والإيقاعات الحماسية، وسبق عحب الجمهور فعدد من العواصم الأوروربية.