كود – كازا //
وزارة التربية الوطنية المغربية دخلات مرحلة جديدة فمحاربة الغش فامتحانات الباكالوريا، بعدما قررات تعمم الجيل الثاني من جهاز “T3 Shield” المغربي الصنع فكثر من 2000 مركز امتحان من مختلف جهات المملكة، هاد لاباري غادي تخدم لاول مرة فالامتحان التجريبي ديال الباك .
https://www.instagram.com/reel/DY7EGTeEcI6/?igsh=ZW1xczl5MTZjZGQ2
وحسب مصادر حصرية توصلات بها ”گود“من وسط الوزارة، فهاد الجهاز المطور كيجي على شكل حقيبة كيتلبس فالظهر ديال المراقب، وما كيفوتش الوزن ديالو 3 كيلوغرامات، هاد الاختراع حاصل على براءة اختراع عالمية، وتم تطويرو بشراكة بين المقاولة الناشئة SensThings وجامعة محمد السادس متعددة التخصصات التقنية.
الجهاز كيعتمد على تقنيات الذكاء الاصطناعي، وعندو القدرة يرصد أي إشارات إلكترونية مشبوهة وسط قاعات الامتحان، سوا تعلق الأمر بشبكات التلفون، الويفي أو البلوتوث، مع إمكانية تحديد المصدر ديالها بدقة كبيرة.
ومن بين القدرات ديالو، أنه قادر يبين التلفونات المخبية، السماعات ديال الودينين لي كيتزرعو لداخل ، وحتى الأجهزة المدمجة فالستيلو، الآلات الحاسبة، السوايع، النظاضر، الملابس الداخلية ولا اي لوازم مدرسية أخرى، بلا ما يهم الشكل أو الحجم ديال الوسيلة المستعملة فالغش، حيث الشكل ديال الجهاز الإلكتروني ما كيأثرش نهائياً على قدرة النظام فالكشف عليه.
كما غادي يتم استعمال الجهاز بشكل متواصل وسط مراكز الامتحان، باش يقدر يكتاشف حتى الأجهزة اللي كتخدم غير من وقت لوقت، مع اعتماد 4 أوضاع مختلفة للاستعمال، من بينها الفحص الفردي للمترشحين، مراقبة الحقائب، تفتيش القاعات، ثم تتبع وتحديد مصدر أي تواصل إلكتروني وسط المركز.
وكيشتغل “T3 Shield” بطريقة آمنة بلا ما يدير تشويش على الشبكات المحيطة، حيث كيقتاصر الدور ديالو على رصد وتحليل الإشارات المشبوهة، مع معالجة المعطيات داخلياً بلا انترنت .
هاد الإجراءات التقنية كترافق عقوبات قانونية صارمة، حيث أن أي مترشح يتم ضبطو بحيازة أو استعمال جهاز إلكتروني وسط القاعة، حتى إلا كان مطفي، ممكن يتعرض لسحب ورقة الامتحان، تحرير محضر رسمي، ومتابعات قضائية تقدر توصل لغرامات مالية وعقوبات حبسية فبعض الحالات المرتبطة بشبكات الغش وتسريب المواضيع.