كود – بني ملال //
حقق الفنان التشكيلي المغربي الراحل أحمد الشرقاوي، إنجاز جديد كيأكد المكانة الكبيرة ديالو وسط رواد الفن المغربي الحديث، بعدما تباعت وحدة من اللوحات ديالو فمزاد علني دار ففرنسا فآخر شهر ماي بثمن قياسي وصل ل 940 مليون سنتيم ،الشي لي خلا العمل ديالو يولي اغلى لوحة مغربية تباعت بالتاريخ.
اللوحة اللي سميتها “علامات في السماء” فات الثمن ديالها 868 ألف يورو، وولات أغلى لوحة ديال أحمد الشرقاوي تباعات فالمزادات الفنية المعروفة لحد الآن.
وكيعتبر أحمد الشرقاوي من أبرز الفنانين اللي بصمو تاريخ الفن التشكيلي المغربي فالقرن العشرين، حيث قدر يطوّر أسلوب فني خاص به مستوحى من الرموز والعلامات المتجذرة فالثقافة المغربية، وقدم تجربة إبداعية متميزة ساهمات فالتعريف بالفن المغربي على الصعيد الدولي.
وكيعكس هاد الرقم القياسي اعتراف عالمي جديد بالقيمة الفنية ديال أعمال الشرقاوي، وبالدور الكبير اللي لعبو فإرساء أسس الحداثة التشكيلية فالمغرب، كما كيشكل مصدر فخر لمدينة أبي الجعد اللي خرجات واحد من أبرز الفنانين المغاربة اللي خلاو بصمة خالدة فمسار الإبداع الوطني.
وكيأكد هاد الإنجاز باللي اسم أحمد الشرقاوي مازال محافظ على المكانة ديالو وسط الأوساط الفنية العالمية، وأن الأعمال ديالو مازالت كتجذب اهتمام جامعي اللوحات والمؤسسات الفنية الكبرى، حتى من بعد عقود على رحيلو.