كود -عثمان والشرقي//
أغنية “زمّلوني” ديال الفنان السوري بو كلثوم وثيقة فنية وإنسانية ، كاتلخص المأساة ديال اللجوء، الغربة، والبحث على الأمان النفسي والجسدي .
الأغنية كاتبدأ بكلمة قوية عندها حمولة تاريخية ودينية كبيرة وهي “زمّلوني”، واللي كاتعني “غطّوني” , بو كلثوم وظّف هاد العبارة باش يعبر على “البرد الداخلي” والوحدة القاتلة اللي كايحس بيها المهاجر فاش كايغيب على البلاد والعائلة.
https://youtu.be/k9T0SuZ-xFg?si=yW-Evu_9RVkbh9Xv
و من النقط القوية فالأغنية هي الطريقة باش كايشوف الفنان “المرأة”. فـ مجتمع كايقدس ديما الرجال، كايجي بو كلثوم وكايقول : “سند أنثى بألف رجال”. المرأة هنا هي الملاذ الأخير اللي كايحمي الظهر من الانهيار وهو السند العاطفي هو الوحيد اللي كايقدر “يلين الطين” ديال الإنسان .
فاش كايقول بو كلثوم المرأة “كيان، مو بس ضلع، اللي انسند عنها وقع”، هنا كيعبر على ثورة فكرية حقيقية فحق الموروث الشعبي اللي كايختزل المرأة فـصورة “الضلع الأعوج” أو الكائن الضعيف اللي محتاج ديما للحماية.
الفنان كايقلب الآية تماماً وكايردّ هاد الضلع هو الأساس والسند اللي هاز الكيان كامل لدرجة “اللي انسند عنها وقع”، يعني أي واحد حاول يكابر ويستغنى على هاد الدفء والحضن الإنساني، المصير ديالو هو الانهيار والسقوط فالفراغ والعدمية.
الحاصول، أغنية “زمّلوني” هي لوحة سريالية كاتوصف الانهيار البشري ولكن كتعطي أمل فالنهوض بالفن والحب. بو كلثوم نجح باش يرجع التجربة الشخصية ديالو لـ مراية كايشوفو فيها ملايين النازحين والمهاجرين ملامح الحكاية ديالهم.