الركراكي: خاصنا نجيبو الكاس ومواطنون كيرددوها فين ما شافو شي مغربي” مبروك عليكم وجيبو لينا لاكوب دي موند

كود الدوحة ت الوكالة المغربية للصور الصحافية كريم فيزازي ///

الدوحة هاد الصباح فايقة زاهية. نعسات او دوزات ليلتها بالاحمر والاخضر. بالتبركيك للاسود للمغرب فكل منطقة فهاد المدينة. هاد الصباح بداتو بنشاط واخا جوها بدا يتبدل. كاينة روح ايجابية سوفلات فهاد لمدينة كلها. روح كتحس بيها فنظرات الناس للمغربي. فحديثهم معاه. مونديال اخر بدا مع بداية امجاد الاسود هنا فقطر. موحالش يسالي الا بالتتويج يوم 18 دجنبر فملعب لوسيل.

المدرب وليد الركراكي كان واضح البارح فالندوة الصحافية بعد الانتصار التاريخي على برتغال رونالدو وغيرو. قال وعلاش ما نحلموش بالكاس. دابا ممكن نحلمو بكاس العالم. خاصنا نمشيو نجيبوها. طبعا الركراكي كيهدر بواقعية كذلك. كاين ماتش النصف. هاد الشي علاش زاد “نقولها ليكم دابا. مازال ما حققنا والو. الطريق مازال صعيبة. عندما ماتش النصف” ديك الساعة كان ماتش النصف مازال ما تلعبش. الاسود ما كانش فراسها باللي غاديين نلعبو مع فرانسا اللي ربحات انگلترا.

الركراكي اللي قال باللي اول مرة كيبكي فحياتو فماتش قال باللي هدفو كاس العالم.

هاد الرغبة او هاد الحلم مس كاع اللي فقطر اللي حاضرين للمونديال من جنسيات ما مولفاش انتصارات كبيرة بحال هادي. مس هاديك الفرملية اللي كانت فصبيطار حمد الدولي وسط الدوحة كتهدر مع صيدلاني يبدو من الاردن ومسؤولة بالامن من تونس. الفيليبينية گالت للتونسية “خاص المغرب يربح الكاس. ربح اسبانيا وربح البرتغال. قادر يربح فرانسا ويربح الكاس”. هاد الفتاة كانت فسعادة كبيرة. ناشطة بزاف. كتكلم مع التونسية بحال ايلى هي مغربية. كتخاطبها. خاصهم تجيبو الكاس. التونسية كانت منتشية بهاد الشي. الصيدلاني معاهم فالهدرة ومتاكد باللي الكاس مغربية. طبعا هو كيزيد عليها عبارة “الكاس خاصها تبقى عربية”.

فالشارع هاد الشي كيضاعف. كل مغربي كيولي سفير للمنتخب. كيولي مفروض عليه يربح الكاس ويجيبها. طبعا هاد الشي فجو زوين. فاحترام كبير. بحب وبمشاعر خارجة من الداخل.

هاد الصورة ديال المغربي تغيرات بعد التأهل للدور الثاني ولكن خدات بعد اخر فالثمن والربع. اكيد غاديين نشوفوها نتاقلات للقمة ايلى ربحو الاسود الديكة فماتش نص نهاية كأس العالم لاربعا اللي جاية

كلنا هنا كنمشيو فوق السحاب. كنعيشو حلم نتمناو ما نفيقو منو حتى يسالي هاد المونديال وندخلو بالكاس. زوين تعيش احلام. زوين تكون هاد الاحلام كتحقق. كتخرج من المغربي تامغرابيت ديالو

إقرأ الخبر من مصدره