شنو ناقصنا باش منظموش المونديال؟ عندنا الشمس والملاعب والبيرة وحسناوات المدرجات والفنادق وجامع لفنا وعندنا الحموشي وعندنا ملك كيهبط وسط الناس فرحا بفوز المنتخب وعندنا أحسن جمهور وأعظم منتخب أفريقي عندنا الدين وقلة الدين عندنا فلسطين وإسرائيل عندنا ليهود والمسلمين المسيحيين والملحدين عندنا الثوار والمنبطحين

محمد سقراط-كود///

مالذي ينقصنا كي لا ننظم كأس العالم؟ عندنا الشمس والملاعب والبيرة وحسناوات المدرجات والفنادق وسوق الداخل وجامع لفنا وعندنا الحموشي شخصيا وعندنا ملك كيهبط وسط الناس فرحا بفوز المنتخب وعندنا أحسن جمهور وأعظم منتخب أفريقي وعربي، وعندنا مسيرة مونديالية تاريخية غادي يتدارو عليها الأفلام والوثائقيات، عندنا الدين وقلة الدين عندنا فلسطين وإسرائيل عندنا ليهود والمسلمين المسيحيين والملحدين، عندنا الثوار والمنبطحين عندنا الممانعين والمطبعين، عندنا بلاد كلها عن بكرة أبيها مبلية بكورة وكتبعها وكتخرج تحتافل من بعد فوز المنتخب في كل ماتش، عندنا التاريخ والحاضر والمستقبل عندنا هنا وبرا، من غير الرشوة وفساد الفيفا لي ستغلاتو قطر راه مازايدة علينا بوالو، حنا قادرين كبلاد وكشعب نظموا أحسن نسخة كاس العالم في التاريخ حيت في المغرب يجتمع ما تفرق في غيره.

في الألفينات فاش كان المغرب كيدفع ملف الترشح وداك الساعة مكان حتى شي تيران مبني من هادو الجداد وباقا البلاد يالله كتقلب على راسها، طبعا كنا كشعب كنشوفوا الأمر ضرب من الجنون وتخوار في طيز حمار ميت، ولكن من داك الوقت لدابا المغرب دار قفزة كبيرة، ولاو الملاعب والمولات والقناطر والمطاعم ولوطيلات والمناطق الخضراء ومدن جديدة تبنات والقديمة تصلحات، مانقصانا حتى حاجة باش نضموا أحسن نسخة لكأس العالم مستقبلا وون الفوق غادي نديوها لتاني مرة، حيت هادي ديال قطر مضمونة في الدجيب.

قطر كلها عبارة على السمارة عندها الغاز والبيترول وجات حدا العركوب، وشناهو هاد مونديال قطر من غير ملاعب قريبة وتجهيزات وعرام ديال العمالة الأجنبية وتيرانات حدا بعضياتهم وسوق واقف عامر بالجزائريين مصدعين الدنيا بالواي واي، المغرب راه كل مدينة بسوق واقف وجالس وكاحز ديالها وكل مدينة بملعبها وإختلافها وجوها وتاريخها وعاداتها وتقاليدها، لولا المغرب والمغاربة شعبا ودولة ماكانش ينجح مونديال قطر وكان غادي يكون عادي وجد ممل مادام أن الجمهور كيبات في قنت واحد وعندو غا بلاصة وحدة يمشيس ليها والمونديال كلو في مدينة وحدة، تظاهرة رياضية راه مافيهاش غير الكورة، فيها أول حاجة التعرف على الناس والعادات والتقاليد وهادشي بلاصتو هي المغرب، مونديال قطر راه تسرق من المغاربة ومع ذلك بكرمهم ورجولتهم ساهموا في إنجاحه وكانوا هم أبطاله، دابا فاش كنشوف البلاد كترشح باش تنظم كأس العالم حقا كنتيق وكنحس بالفخر الإيمان واليقين التام أننا قادرين نظموا أحسن نسخة.

إقرأ الخبر من مصدره