شوفو نفاق الريسوني واوريد. كيفاش كيسبحو بقطر ونساو “من غشنا ليس منا”. دولة خدات المونديال بالغش وماتو عشرات “المسلمين” فمشاريعهم وكتعامل لمغاربة بدونية ودعمات الاخوان باش يوصلو السلطة ويغيرو انظمة بلدانهم واليوم كيقولو عليها قدوة

كود احمد الطيب ////

احمد الريسوني الفقيه المقاصدي هاد ليام عندو قصد واحد. يشكر قطر. يثني على قطر. كتب كيشكر فيها واخا كتبتو فيها لكذوب بزاف على الشراب وعلى المثلية وعلى وعلى …. معاه حسن اوريد اللي من نهار اللي جراو عليه من مناصب الدولة وهو كيتقرب بزاف للاسلاميين. عارف جزء من الدولة ما عندهمش معاهم وبغى يفقصهم. حتى هو روج الاكاذيب باش يشكر قطر. 

نساو هاد الجوج باللي “من غشنا ليس منا”. دابا قطر بدات اصلا الحصول على تنظيم كأس العالم بالغش. خداتو بالغش. شفتو اش وقع اللي صوتو لصالحها اش وقع ليهم وكيفاش تفجرات قضية كانت غادية تسالي اصلا مع “الفيفا”. كاع اللي عطاوها الكاس اما فالحبس او دوزوه وتمت ادانتهم. 

باش يكون اسناد التنظيم بالغش اذن كلشي غـش. البناء بدا فاسد. خلينا من لفلوس لكثيرة اللي عندهم.

الفقيه الريسوني نسى هاد الشي او تناساه او يمكن خدم الفقه المقاصدي. المهم التنظيم. الطريقة ماشي مهمة. هنا نعرفو اخلاقو كيف دايرة لا هو ولا حتى المدافع الشرس على قطر حسن اوريد. 

هادو بجوج كيعرفو قطر مزيان. كيعرفو ان عدد من العمال من سريلانكا وبنغلاديش والهند ماتو فاوراش دارت للمونديال. منظمات حقوقية كتهدر على 6 الاف شخص. القطريون نفاو ولكن ما قالوش الرقم. المهم ماتو مسلمين. لان غالبية هادو اللي كيجيو من هاد الدول باش يخدمو فالدولة النفطية الغنية مسلمين. يعني هاد لفقيه كيميز بين المسلم القطري والمسلم البنغالي. هاد الاخير ما كيستحق والو. 

من خلال مشياتو لكبيرة لهاد الدولة كان يدور فاحياء حتى الجوامع فيها ائمة من الهند او بنغلاديش. ما كيصليوش معاهم لا القطريين ولا غيرهم. دولة حتى فالدين مفرقة حسب الجنسية.

زيد على هاد الشي الطريقة اللي كيتعاملو بيها مع الاجنبي كيفما كان. “كود” فالمونديال تلاقات مع مغاربة كثار خدامين تماك. خدامين فخدمات بسيطة كتخليهم يتحكو يوميا بالقطريين. كيشعرو بالدونية. باللي هما اقل شأن من القطريين واكثر شأنا من النبغاليين. الطبقية خدامة وهاديك هدرة الاسلام ما كيفرقش بين المسلمين غير كولوها. 

الريسوني عارف هاد الشي وساكت عليه. عارف هاد التمييز وساكت عليه. بحالو بحال صاحبو اوريد. 

هما بجوج روجو لكذبات على المونديال وهما عارفينها كذبة. بحال الشراب ما يكونش فالتيرانات وهو كان. بحال رفع الاذان فالافتتاح وهي غير اية تقرات. 

هادو بجوجهم نساو اش دارت قطر الدولة الداعمة للاسلام السياسي من مجهود باش تغير انظمة. جابت خراب لشعوب. شفنا دول حولاتها الحرب لخراب. قطر وقنواتها خاصة الجزيرة لعبات دور فهاد الدمار. دمرات دول وبنات دولتها. هادا هو النموذج اللي كيدافع عليه اوريد والريسوني

إقرأ الخبر من مصدره