استمرار لعرايشي على رأس التلفزة المغربية اهانة للمغاربة فداك النقل ديال لعراسات فالتسعينات. هادا جيل جديد وباراكا من هاد الباطرون اللي فشل فنقل حفل استقبال الاسود وهادي فرصة يطيرو كاع ناس الاعلام العمومي 

كود هناء ابو علي ////

النقل التلفزيوني للشركة الوطنية للاذاعة والتلفزة البارح لحفل استقبال الاسود نجوم المونديال القطري الاخير٬ كان كارثي. رئيس الدولة قال فبيان رسمي نشراتو وزارة القصور الملكية والاوسمة والتشريفات “سيحظى الفريق الوطني باستقبال شعبي وجماهيري كبير” وباللي غادي يكون احتفاء وتقدير لهاد “الانجاز التاريخي العظيم”. طبعا هاد الاستقبال الشعبي والجماهيري لهاد الانجاز العظيم تنقل البارح فالتلفزيون بطريقة بدائية متخلفة.

هاد الشي راه بدا فالمونديال. كيفاش قناة عندها حقوق نقل مباريات المونديال راسلة يالله 6 صحافيين والتقنيين. تصورو مصر ما مشاركة ما عندها حقوق وقنوات عندها رسلات 20 صحافي وتقني وحنا بلادنا مشاركة ووصلات لنص النهاية راسلين هاد الفريق الصغير بزاف. 

عادي بهاد العدد وبهاد اللا استعداد لهاد الحدث٬ غادي تكون التغطية ضعيفة وبزاف. 

نرجعو للبارح. هاداك النقل ديال لعراسات وماشي اليوم. اللا لعراسات ديال اليوم كيعرفو ينقلو وبحرفية كبيرة. البارح كان نقل لعراسات فالتسعينات. حتى حاجة ما نجحات فيها فهاد النقل. حتى لبلاطو كان ضعيف. 

تصورو جابو يهدر على الركراكي وجيلو الجديد جيل قديم. صحافيين من الزمن الغابر. علاش جبتو وحدين كيهدرو هدرة خاوية على الوطنية وعلى الراية وعلى النشيد الوطني. اش هاد التخربيق. لبلاطو ماشي ديال الوقت. النقل وزوايا التقاط المشاهد ماشي ديال الوقت. الاخراج ماشي ديال الوقت. كيفاش حدث كبير بحال هادا ما يجيبوش ليه مغاربة قافزين فالاخراج. كاينين هادو وخاص اللي يدعمهم. 

المحسوبية والتصاحيب والعلاقات اللي خدامة فالشركة الوطنية للاذاعة والتلفزة. شي خاصو يمشي تقاعد وفاتوالتران ومازال كيزيدوه. جيل جديد كيدخل للشركة بحماسة وغير يدير رجلو فباب الشركة كيبدا يتحارب وكيعيش احباط. اما يهرب واما يتكمش ويبقى يشد الصالير. 

المشكلة لكبيرة فهاد الشركة هي لعرايشي فيصل. الرئيس المدير العام للشركة الوطنية للاذاعة والتلفزة. هادا راه فمنصبو من نهار وصل سيدنا للعرش. راه خاص الدولة اما تحيدو واما تحتافل بعيد وصولو لهاد المنصب. راه عبثي هاد الشي.

اللي وقع فالمونديال راه حدث عظيم فتاريخ المغرب الحديث. ما يمكنش يبقى واحد بحال لعرايشي او غيرو فمناصبهم. بلادنا تستحق تلفزة احسن من هادي. نقل تلفزيوني احسن من اللي اقترفوه البارح صحاب لعرايشي. 

الاعلام العمومي كولو تقريبا فشل فمونديال قطر. كان ضعيف بزاف. قنوات رسلات صحافي وتقني واخرى رسلات مؤثرين ومؤثرات. اش هاد الاستهزاء بالخدمة. 

بلا اعلام عمومي قوي لبلاد غادية تبقى غادية عرجا. التغيير خاصو يبدا اليوم قبل غدا. تعطلنا بزاف بزاف

إقرأ الخبر من مصدره