كود كازا ///
البارح سيدنا عطا اوسمة بيدو لرئيس الجامعة ولمدرب الاسود وللعابة 26 اللي جاو مع ماواتهم ولكن فبيان وزارة القصور الملكية والتشريفات والاوسمة٬ كانت عبارة فيها ان اوسمة اخرى غادية تعطى. “تسليم اوسمة ملكية لجميع الطاقمين التقني والطبي للمنتخب الوطني” وبرر هاد الشي ب”تقديرا للعمل الاستثنائي الذي قدموه”.
قراو مزيان. الطاقمين التقني والطبي. يعني مساعدي المدرب والتقنيين اللي خدامين معاه والفريق الطبي ديال المنتخب فقط لا غير. هنا فالصورة اللي نشروها هاد الطاقمين التقني والفني البارح الثلاث 20 دجنبر فالليل فيها مرا.
لمرا خدامة فشركة “اس تور” وهي وكالة اسفار وهي اللي واخدة المارشي ديال “النقل والايواء” لجميع المنتخبات. يعني عندها صفقة دار ليها طلب عروض وتقدمات هاد الشركة وربحات المارشي. نفتارضو هاد الشي اللي وقع.
الغريب ان هاد نزهة فبلاصتها من نهار كان الجنيرال حسني بنسليمان رئيس للجامعة الملكية لكرة القدم. كانت كتدخل للتيران فقطر. ركبات فالكار اللي مشى للقصر. التسيب وصافي. اش من صفة؟ خدامة فشركة “اس تور” مكلفة بالايواء للمنتخب.
هادي كتحكم فالجامعة. شكون فالقصر اللي فرضها ودخلها باش تاخد وسام. اش من علاقة عندو بهاد السيدة او الشركة اللي خدامة فيها. كيفاش يقدمو للملك وحدة ما عندها علاقة بالمنتخب وتاخد وسام.
فضيحة بدات فقطر ووصلات للقصر. ما كرهوش هادوك اللي كيدافعو عليها يدخلوها مع اللعابة باش تسلم على سيدنا. شكون وقف هاد لفضيحة. اللي فشي بلاصة خاصو يكون فيها. اعضاء اي وفد فالعالم الا فالمنتخب المغربي. تصورو هاد الشي وقع لمنتخب كلشي مسلط عليه الضو.
بالعودة للاوسمة. شفنا مسؤولين فالجامعة خدامين ليل ونهار وما خداوش هاد الوسام. المكلفين بالادارة بكاع انواعها. هادو خدامين غير مع الجامعة هي بوحدها اللي كتعطيهم صالير ولكن ما تعطاهمش وسام وتعطى لهاد نزهة.
Laisser un commentaire