سهام البارودي ـ كود//
الشيخ سار دار گروب قاليك “لا للزواج من الموظفات” وطبعا الگروب خلق ضجّة فالسوشل ميديا !
أنا شخصيا ماعنديش مشكل فالاختيارات الفردية د الأشخاص! لي بغا يتزوج بمرا موظفة الله يسهل عليه ولي بغا يتزوج بوحدة جالسة فالدار الله يطليها بيه! ولكن بحكم أني مرا وكانهضر مع العيالات وداخلة فگاع الگروبات النسائية فالفايسبوك فراه كانشوف وكانقرا كل نهار عرّام د المشاكل د العيالات لي أساسها هو الاستقلالية المادية !
كاتلقاها كاتشكى “البنات نصحوني شنو ندير، راجلي كايضربي ! عاد زرّگ ليا عيني وكايعايرني ومالقيت ماندير معاه ماعندي فين نمشي وعائلتي مايقبلونيش شنو ندير؟” ولا “عافاك ادمين حطي المنشور بلا سمية، راجلي حصلتو كايخوني وماعرفت ماندير، مانقدرش نطلّق حيت عندي معاه الولاد وماخداماش…”، ” عافاكم البنات راجلي سقرام كايعطيني غا فلوس التقدية الگرصون ماعنديش شنو ندير؟”
الأغلبية الساحقة د المشاكل د العيالات فالمغرب هي مشاكل مادية والأغلبية الساحقة ديال العيالات لي جالسين فالديور كاتلقاها تعيسة وعايشة معذبة مع الراجل ولكن صابرة علاش؟ حيت ماعندها فين تمشي! ماعندهاش بزطام! صالير! خدمة كاتضمن ليها الاستقرار المادي وتعطيها ديك لابوسيبيليطي أنها تقود فحالاتها إلى الحياة الزوجية ماسلكاتهاش !
الشيخ سار ولّي فحالو هادشي لي باغين يصنعو لينا، عارفين هوما أنه عمل المرأة كايضمن ليها الاستقلالية المادية لي كاتخليها غدا ولا بعدو تمشي فحالاتها إلى ماعجبهاش الحال أو ماتفاهماتش مع الزوج! هوما لا! مابغاوهاش تكون عندها هاد الإمكانية بغاوها تبقا عايشة عبدة للراجل حيت هو لي كايصرف !
الإنسان السوي، راجل أو مرا فاش كايتزوج كايقلب أنه يبني علاقة سوية مع الآخر تكون مبنية على الحب والاحترام والتفاهم ونهار كايسالي الحب ولا ماكايبقاش الاحترام ولا شي واحد فيهم ماكاتبقاش عاجباه الحياة مع لاخور كايساليو العلاقة ديالهم باحترام وبهدوء وكل واحد كايمشي فحالاتو! هادو الناس لي بعقلهم! ولاد الناس !
المساخيط لا ! ولاد “الناس” كايبغيو يبنيو علاقهم مع الآخر وخصوصا المرا على الحگرة والاستعباد وأنا مول الدّار وأنا لي كانصرف عليك وأنا لي معيشك نتي وولادك وانا لي كانتحكم ليك فحياتك… وواخا تحرار معايا العيشة خاصك تبقاي معايا، وواخا يكون فمي خانز خاصك تصبري وتبوسيني واخا نضرب خاصك تحني الراس وواخا تلقايني كاندوي مع البنات فواتساب خاصك تسكتي وواخا يكون عندي القذف السريع خاصك تصبري وتحمدي الله! تحمدي الله لي عندك راجل كايصرف عليك! راجل داير ليك قيمة! راجل معيشك معاه….تااااااا نبغي أنا وطلعي ليا فراسي أنا ومانبقاش حاملك أنا ونبغي نسيفطك فحالك أنا عاااااد نطلقك وديك الساعة حيت ماخدامة ماردامة سيري تقحبي و لا خرجي تشردي فالزنقة !
وأصلا آخر واحد يمكن ليه ينظر فالحياة الزوجية هو الشيخ سار، قاليك ماتزوجش بامرا موظفة وإلا ستبوء حياتك بالفشل! وا راه نتا مّك ماخدامة ماردامة وماشي موظفة وهاكاك طلّقها بوك وسيفطك تعيش مع خوالك فبيت! واش كون كانت مك موظفة آ الياس كنتي غاتعيش فبيت؟
Laisser un commentaire