كود الرباط//
فضيحة جديدة تنضاف لفضيحة التذاكر، عبد المالك أبرون رئيس البعثة المغربية للمنتخب الوطني المشارك في كأس العالم بقطر، تستقبل بحال الاستقبال لي كيدار لرئيس الدولة سيدنا محمد السادس.
هاد الاستقبال داروه أطر وموظفو شركة كولديفيزيون Coldvision بمقرها العام بالرباط، تحت رئاسة ولدو عماد أبرون، وجابو الغياطة باش يستقبلو أبرون ويقدمو ليه الهدايا.
الاستقبال لي دار ولدو فيه بوس اليدين، كيكرس صورة خايبة لهاد المسؤول الجامعي، للي هو نيت الباطرون ديال الشركة، بحيث عاملات نظافة لي كولشي عارف ظروف ديالهم باسو ليه اليدين.
هاد ولد أبرون تجبد فقضية فضيحة تذاكر مونديال قطر، وكاين فيديو، وباش يرد على الانتقادات دار استقبال لباه حيث رئيس البعثة، مع العلم أن أبرون متختارش فالأول يكون رئيس الوفد لأن جوج اللي تختارو اعتذرو لظروف خاصة، وملي مكاينش البديل تعطات الرئاسة لأبرون.
من غير فضيحة التذاكر، بوسان لليدين شوهة ليه ولولدو، ويلا كان أبرون كيكرس هاد الثقافة ديال بوس اليدين فراه عبودية وفضيحة، حتى سيدنا مبقاش كيقبل بها، وشفنا تقليد السلام على الكثف هو السائد مؤخرا فأنشطة الملك.
للي كيستحق الاستقبال هوما اللعابة والطاقم التقني والطبي لي تقاتلو باش يوصل المغرب لدومي فينال، أما لي كيعجبو تصاور ويبان أنه البطل غير كيبغي يركب على الموجة.
شفنا فوزي لقجع رئيس الجامعة لي دار كولشي وغامر بمدرب جديد وحاضر ديما فالتداريب تقريبا، وكيتنقل بين المغرب وقطر، مرة كيجي يفك مشاكل مشروع قانون المالية مع المحامين وباقي القطاعات، ومرة كيرجع للمنتخب باش يوقف على كل صغيرة وكبيرة. مدارش هادشي لأنه ببساطة معندوش مع كثرة اللحيس والأضواء.
Laisser un commentaire