علاش “ولدي للي نجح عندو جوج اجازات وباه لاباس عليه رسلو لكندا” كانت صادمة لعدد من لمغاربة؟ فيها تعالي كبير باش هدر على راسو بالغائب وفيها تكبر باللي مرفح وفيها تحدي للي ما عندوش باه فالعرس وفيه قتل لتدرج اولاد الشعب فالسلم الاجتماعي

كود هناء ابو علي ///

علاش تصريح عبد اللطيف وهبي وزير العدل ديال ول البارح كان صادم؟ كنهدرو على تصريحو فالرباط واللي قال فيه باش سولوه على ولدو اللي نجح فمباراة المحاماة المثيرة للجدل “ولدي للي نجح عندو جوج اجازات” كون بقى غير فهاد الحد كان التصريح يكون اقل صدمة. بل زاد جملة صادمة مستفزة من فم سياسي جا من اليسار “باه لاباس عليه رسلو لكندا”.

باش تعرفو هاد التصريح غبي من سياسي كيبان ذكي نشوفو الشكل. قال للصحافيين ومصورينو بالفيديو: هاد الشي “اوف”. اي ما غاديش يتقال بلسانو… تصريح فيه صحافة مختالفة ومصور بالفيديو وبغاه يكون “اوف”. 

تعاليه وعجرفتو خلاتو يطيح فهاد الخطأ القاتل فالتواصل. ما يمكنش بعد مباراة المحاماة اللي ثار فيها نقاش كبير يطلق هاد الجملة.

فاللول كان ذكي فتصريحاتو اللي ماشي باسمو.  هدر على نجاح غير 800 وتزادت 1200 وتكلم علي لجان تكلفات بالامتحان وطريقة فالتصحيح تبعد الشبهة عن الوزارة. هدر على البعد التشاركي بين القضاء والمحامين. حتى لهنا كان مزطط راسو. حتى باش سولوه على اولاد المحامين للي نجحو جاوب ما يعني ان ابن الوز عوام. حتى هادي تقدر تختالف معاها ولكن مقبولة.

لكن باش خرجات اللائحة وكبرات كورة الفضيحة دار تصريحو الشهير البارح على ولدو. قال باللي ولدو “عندو جوج اجازات” بينما مرشحين عندهم اكثر من اجازة وحتى ماستر او دكتوراه وما نجحوش. لكن الجزء الثاني من الجملة اللي كانت اكثر صدمة “وباه لاباس عليه. رسلو لكندا”. فهادي بان متعجرف وحاس براسو. تصورو كيهدر على راسو بضمير الغائب “باه”.

هادا كيعني ما يعني وكيعطي صورة على نفسية وهبي. زادها باللي هاد الاب اللي هو وهبي ملايري عندو لفلوس وعليها قدر يرسل ولدو لكندا يقرا. طبعا الدراسة فهاد الدولة مكلفة ماديا. 

اولا هاد التبريرات باش ينجح ولدو فامتحان المحاماة ما شاداش. ما يكفيش تكون قاري فكندا باش تنجح. لكن اسلوب الاستعلاء اللي فيه تحدي للمغاربة لمزاليط اللي دوزو اولادهم هاد المباراة٬ كان صادم. 

هادا كيفسر طبيعة هاد السياسي. خرج للي كيفكر فيه وما عمرو قدر يقولو فالساحة السياسية. كان كيهاجم اخنوش فالحملة الانتخابية بلفلوس. بان باللي هو كيوظفها باش يحسس المغربي العادي باللي قل منو. 

ماشي زلة لسان هادي. وهبي بصاح ملايري من عائلة ملايرية دارت لفلوس من صناعة الادوية. غير هو ما باعش هاد الصورة للمغاربة. باع ليهم المناضل السابق فاليسار اللي شوية راديكالي٬ كيدافع علي الطبقات الفقيرة. باع عليهم حلمو بمغرب كلشي فيه بحال بحال. باع ليهم خطاب هو براسو ما عمرو أمن بيه.

وهبي شخصية سياسية غريبة. من نهار دخل لحكومة اخنوش =وحتى قبل= مرة طالع مرة نازل. قبل هاد التصريح كان فموقع مرتاح. خرج رابح فمعركة المحاماة. نفس المهنة اللي كيخدم فيها هو٬ طيحاتو دابا. طيحاتو قدام الرأي العام. صعيب بعد هاد التصريح يجي للبرلمان ويدافع على القانون الجنائي او اي تعديل ليه. تيرا فراسو

إقرأ الخبر من مصدره