“كارديان”: نايضة بين حفاد إليزابيث.. الأمير ويليام ضرب خوه الأمير هاري وطيحو لارض

كود عن “كارديان”

قال موقع “كارديان” إن الأمير هاري دار سيرة ذاتية جديدة اللي مزال مخرجاتش كتب فيها أن ويليام خوه الكبير ضربو طيحو لأرض فواحد اللقاء كان ف 2019.

وحسب الكارديان، جا ف السيرة الذاتية لهاري المرتقبة، أن الأمير هاري كيقول أنه كان هجوم جسدي من خوه ويليام عليه بسباب زواجو بميغان ماركل وانهارت علاقتهم.

وأضافت، أن المدابزة بيناتهم بدات فاش جا ويليام لعند هاري لدارو فلندن ف 2019، وعاير ليه مرتو بالوقحة والصعيبة، والشلاخة، تطورالصداع بيناتهم حتى شد ويليام خوه وقطع ليه سنسلة فعنقو وطيحو للأرض.

هاري كيقول إنه تصاب ف ظهرو وهي وحدة من المشاهد اللي غتنتشر فالعالم السيمانة الجايا وغالبا غدير ضجة كبيرة للعائلة المالكة البريطانية.

وأضاف موقع الكارديان أنه قدر يحصل على نسخة من الكتاب وخا الإجراءات الأمنية الصارمة قبل مايخرج الكتاب.

هاري كيروي الحدث منين جا ويليام باش يتناقش معاه على علاقتهم وصراعاتهم مع الصحافة ولكن ويليام كان جاي سخون كيفما قال هاري، وأضاف أن ويليام مكانش عقلاني اللي خلا الصداع ينوض.

هاري اتهم خوه على أساس أنه متقبلش يكون وريث احتياطي، وتبادلو الإهانات، ويليام قال أنه بغا غير يعاون، جاوبو هاري ” واش من نيتك، تعاوني، واش هادي هي المعاونة؟”،

كيقول هاري أن هاد التعليق عصب خوه وبدا كيتحلف عليه وهو غادي عندو، وأضاف هاري أنه كان خايف، ومشا للكوزينة وتبعو خوه.

هاري عطى لخوه كأس دالماء وقالو منقدرش نهدر معاك ونتا فهاد الوضع، وأضاف أن ويليام حط الماء، وجا ليا بالزربة شد فاحوايجي من العنق وقطع ليا السنسلة، داكشي وقع بالزربة ولاحني للارض، نزلت على الطبسيل فاش كياكل الكلب اللي جرحني فاظهري، بقيت مليوح شوية وأنا مصدوم ووقفت وجريت عليه.

للإشارة الكتاب كان داير على الاستياء ديال هاري من كونو “احتياطي”، وفيه فصول على طفولتو وتعليمو المدرسي، ومسيرتو كملك فالجيش البريطاني، وعلاقتو بوالديه وخوه وحياتو مع ميغان.

وتم تأجيل الخروج ديال الكتاب دهاري ومن المقرر بث مقابلتين مع هاري في المملكة المتحدة والولايات المتحدة في نهاية هذا الأسبوع، مع ITV News في Ten وCBS 60 Minutes.

إقرأ الخبر من مصدره