البدراوي دارها بصح وخرج الصينية باش يجمع لفلوس من عند جمهور الرجاء

كود سبور//

طلق عزيز البدراوي رئيس الرجاء الرياضي بشكل رسمي “الصينية” باش يجمع لفلوس من عند جمهور الفريق والمحبين ديالو، تحت مسمى ’’مبادرة لجمع التبرعات‘‘، من بعدما عجز هو كرئيس عن حل المشاكل المالية للفريق الأخضر وتبين أن كلامو كثر من مالو.

وأكدت إدارة الرجاء برئاسة عزيز البدراوي أن هاذ التبرعات الهدف ديالها هو تخطي المرحلة الحساسة الحالية بنجاح، وخلق دينامية مستمرة بنظام وفاء متكامل يربط المشجع بالنادي فإطار رابح رابح.

إدارة الرجاء قالت إن جمع التبرعات هي خطوة جات لتدارك تبعات الأزمة المالية الخانقة للفريق، ودعت المشجعين ديال الخضرا للتبرع ولو بمبلغ مالي رمزي.

ومازال جمهور الرجاء الرياضي ما مستوعبش خطوة عزيز البدراوي، حيث هو شد النادي على أساس أنه مول الشكارة والميلياردير اللي غيحل الأزمة، ولكن حتى حاجة من هادشي ما وقعت من غير أن الفريق زاد تأزم ماليا بسبب النزاعات اللي عليه، والبدراوي جاب لاعبين أقل مستوى وبزاف من اللاعبين اللي جرا عليهم مع نهاية الموسم الماضي.

إقرأ الخبر من مصدره