إلى بغا المغرب يربح كاس العالم في الطريقة الوحيدة هي يستافد من المهاجرين الأفارقة ومايبقاش غير بلد عبور للأبطال ويدمجهم في المجتمع ويدير برنامج لإكتشاف المواهب لدى المهاجرين ويجنسهم وفق ذلك

محمد سقراط-كود///

الكاميروني فرانسيس نغانو واحد من أعظم الرياضيين ديال فنون القتال المختلطة وبطل العالم فيها، وقبل ما يولي بطل راه كان غير مشرد في الغابة ديال بليونش تما كيبات ويعيش ويطلب الماكلة والخبز جنب الطريق حتى قدر يهاجر ومن بعد تشرد في فرنسا، ولكن حيت فرنسا ماشي بلد عبور بالنسبة للعديد من المهاجرين كتاشفوه تما وعرفوا موهبتوا وبدا الملاكمة حتى وصل 27 عام ومع ذلك خدا حزام بطولة العالم، هاد البطل راه كان مشرد في الغابة غير هنا عندنا كان يمكن الإستفادة منو لأنه جوهرة حقيقية كان يقدر يولي بطل مغربي أو على الأقل يتدرب هنا ويستاقر ويتزوج ويولد أبطال مغاربة مستقبليين، بحال الأبطال المغاربة لي تزادو برة.

المنتخبات الأوروبية القوية كلها عامرة بأبناء المهاجرين، فرنسا راه جوج ألقاب ديال كاس العالم ونهاية غير بأبناء المهاجرين والمهاجرين براسهم بحال كامافينغا لي مهاجر ومخدا الجنسية حتى ل2019 ومع ذلك راه في المنتخب الفرنسي لي وصل للنهائي، بينما المغرب عامر برياضيين مستقبليين على مستوى عالي غير ضايعين في السطوبات أو مراكز الإتصال أو كيباتوا في الغابات في إنتظار إقتحام سبتة ومليلية أو الموت وهم يحاولون،وهنا راه مواهب كبيرة كتضيع للبلاد عوض تستافد منها غير كيدوزو وكيمشيو لبلدان أخرى معندهاش مشكل أنها تنوع الديمغرافية ديالها وتلقمها بأعراق مختلفة.

إلى بغا المغرب يربح كاس العالم في الطريقة الوحيدة هي يستافد من المهاجرين الأفارقة ويدمجهم في المجتمع ويدير برنامج لإكتشاف المواهب لدى المهاجرين ويجنسهم وفق ذلك، بحال المنح الرياضية لي كتدير الجامعات الأمريكية، راه مايمكنش يبقى المغرب نقطة عبور للعديد من المواهب الرياضية وكتمشي تستافد منها أوروبا، وفي النفس الوقت كاين حتى رفض وتخويف مجتعي من الإختلاط على أساس حنا شنو دابا راحنا خليط من الأعراق والأجناس المتعاقبة على هاد البلاد عبر التاريخ أي واحد كيدير إختبار الحمض النووي ديالو راه في الغالب كيطلع ليه الجين الشمال افريقي ومن ثم الإيبيري مع شوية ديال الأفارقة جنوب الصحراء ومرة مرة شوية دالعرب واليهود حتى ديال أوروبا الشرقية وشوية ديال الطاليان وكاين لي عندو تنوع ما كثر ولكن مكاينش عرق صافي وهاد التنوع هو قوة المغاربة وخاصو يزيد يتعزز، باش حتى حنا نشوفو مستقبلا أبطال بحال مبابي بجنسية مغربية يجيبو للبلاد كاس العالم لي عمر شي دولة افرقية حلمات بيه بينما اللعابة الأفارقة جابوه لفرنسا.

إقرأ الخبر من مصدره