أحمد الطيب – كود الرباط//
ما عندها حتى معنى وضرب كبير في تواصل الجامعة الملكية لكرة القدم، خصوصا وأنها يوم الخميس تعلن عن عدم المشاركة في مسابقة الشان بالجزائر وفي المساء تجي تقولينا واقيلا غادي نمشيو للجزائر. الفيلم باين شكون موراه هاد الصباح فاش وزير الخارجية بوريطة قال للصحافة اجيو للمطار تصورو بعثة المنتخب.
الصحافة كلها نشرت خبر أن المغرب مصر على رحلة مباشرة على متن لارام، ودبا جات الخارجية كاتقول للصحافة تجي للمطار؟؟؟ واش الخارجية ضومين ديالها هوا الكورة. والمطار يوجد في المغرب ماشي في الخارج.
المهم ان رسالة الخارجية تضع الجامعة امام امتحان المصداقية. المغرب صارم فالسيادة ديالو وخاص الجامعة تكون واضحة، ومكانش على الخارجية تدخل فالموضوع نهائيا. كاين تصريح رئيس الجامعة سطوب.
واش دخل وزارة الخارجية؟؟؟ واش المطارات تابعين ليها؟ رونات الرأي العام على والو.
واش كاينا شي مشاركة باقي في يوم الافتتاح وباش من نفسية وارهاق غادي امشيو هاد اللاعبين ؟.
كولشي عارف بلي الجزائر رفضات فتح الاجواء. بلاش هاد الرقصات ديالو ابوريطة.
يا بوريطة خلي الجامعة الملكية تكون قد الكلمة وصارمة وخليو دراري يرتاحو راه النظام الجزائري فيورطة وضع نفسه فيها باغلاقه للاجواء أمام المغرب، والرباط خاصها من الان فصاعدا تشتارط رحلات مباشرة على متن لارام على الجزائر دفاعا عن سيادته.
دبا بانت الاعيب بوريطة وتسبب فورطة لصورة بلادنا، ودار تشويش على الجامعة. بهاد التصرف فاش عيط للصحافة باش تمشي تحضر لمطار سلا باش تصور بعثة المنتخب، راه هادشي كيتسما الركوب على قضية رياضية.
يشار بلي البارح بالليل، أكد فوزي لقجع رئيس الجامعة الملكية المغربية لكرة القدم أن المنتخب الوطني المغربي لأقل من 23 عام جاهز باش يشارك فكأس إفريقيا للمحليين بالجزائر، ولكن بشرط يسافر بطائرة مغربية إلى الأراضي الجزائرية.
Laisser un commentaire