كود هناء ابو علي ///
اللي مشى للمونديال فقطر عرف حقيقة هاد الدولة الخليجية. دولة ما كاينش اللي كيتحرك ولا كيكتب ولا كيصور بلا ما يعرفو امنهم او امن جابوه يحظيهم. قطر تميم ولد موزة كلشي محظي فيه. دابا هاد الدولة داخلة فعداء كبير ضد بلادنا. مخدمة عندهم صحافي جزائري مريض ببلاد اسمها المغرب اللي هو حفيظ الدراجي.
هاد الصحافي اللي نهار جا الرئيس الجزائري عبد العزيز تبون لقطر٬ كان فلقاء معاه مع ديك خديجة بن قنة ديال الجزيرة القطرية.
هاد الجزائري اللي صعيب عليه يكون صحافي وباحرى صحافي مهني ولى تخصصو المغرب. يجبدو ليل ونهار. ما يمكنش ما يديرش تدوينة يهاجم بلادنا
من حقو يسب ويعاير بلاد كان ديما كيدوز فيها العطل حتى بدل موقفو بعد ما طلبو منو سيادو جينرالات الجزائر. من حقو يتخصص فبلادنا. لكن باش يكون فقطر ماشي من حقو. هاد الدولة راه ما عندكش الحق تصور حتى العافية شاعلة فدار او فطونوبيلة. ما عندكش الحق تحل فمك وتنتاقد شي حد. ما عندكش الحق تكتب تدوينة تنتاقد فيها شي جهة حكومية.
فدولة بحال هادي باش ينتاقدك صحافي خدام ف”بيين سبور” كيتخلص من قطر راه هاد الدولة اللي كتهاجمك.
المغرب خاصو يكون صارم مع بحال هاد الدول. راه هجومو المتكرر يستحيل يكون حرية فبلاد ما عندها حرية.
ايلى بلادنا ما بغاتش تدخل فخلاف ويطور لازمة مع هاد الدولة ممكن تستضيف معارضين للنظام القطري.
حنا اولا بلاد فيها الحرية كثر. حرية انتقاد المؤسسات ماشي بحال قطر الحرية الوحيدة هي انتقاد كاع دول العالم باستثناء دولة قطر ومؤسساتها.
المغرب عطا لهاد البلاد بزاف وما عمرو خدا شي مقابل. فالصحرا رافضين يدشنو قنصلية فالداخلة او العيون كيف دارت دول خليجية بحال البحرين والامارات. كيدعمو الجزائر والبوليساريو بطريقتهم. شوفو غير شكون الجهات اللي كتمول الجبهة تعرفو مكر هاد الدولة.
قضية الصحافي الجزائري اللي كتمولو قطر خاصها تكون نقطة تحول، هاداك بوريطة اش كيدير. علاش ما كيتحركش. التحرك يبدا فابعاد هاداك السفير المغربي فقطر محمد سيتري. سفير ضعيف خدمتو يشكر ليل ونهار نظام دولة طالقة علينا الجزائريين.
Laisser un commentaire