اسماء غربي- كود//
أكد وزير الداخلية عبد الوافي لفتيت في جواب على سؤال برلماني، أن مقهى ديال الشيشة فسلا مفتوحة بشكل غير قانوني وتقع بالقرب من إعدادية، مؤكدا أن الأمن والسلطة المحلية كايديرو خدمتهم من خلال مداهمات مستمرة وحجز أدوات الشيشة.
الأمر يتعلق بمقهى كاينة فالعمارة 29.30 بشارع لالة أمينة بتابريكت بسلا، أكد لفتيت أنه سبق صدر فيها قرار الإغلاق بسبب مخالفتها للقوانين، لكن رئيس جماعة سلا عطاها من جديد إذن بالاستغلال بناء على طلب استعطاف وماشي بناء على القوانين الجاري بها العمل.
لفتيت أضاف أن السلطة المحلية ديال تابريكت راسلت رئيس الجماعة باش يتاخد الإجراءات المطلوبة قانونيا.
فنفس السياق، توصلت “گود” بمراسلتين، الأولى ديال مؤسسة الوسيط، وهي رد على مواطنين تقدمو بتظلم بسبب الأضرار ديال الشيشة، كاتقول بأن جماعة سلا عطات الإذن بالاستغلال لصاحب المقهى المذكور، بعدما وقع التزام بعدم تقديم الشيشة.
والمراسلة الثانية هي جواب للمفتشية العامة للإدارة الترابية، على شكاية المواطنين، في شأن نفس المقهى، كاتقول فيها مفتشية وزارة الداخلية أن السلطة المحلية تنتظر إصدار جماعة سلا قرار إغلاق المقهى باعتبارها صاحبة الاختصاص، لكي تعمل على تنفيذه.
دابا هادشي تقريبا شهر وزيادة، ومزال، لي خلا المواطنين المتضررين يفكرو في الخروج للشارع من أجل الاحتجاج، مستغربين كيفاش المنتخبين لي مسيرين جماعة سلا مكيفكروش فمصلحة المواطنين، وكايتحداو القانون والسلطة والأمن لي عبرو على احترامهم لهاد المواطنين وتفاعلو مع الشكاية ديالهم.
Laisser un commentaire