الخوانجية فاش كايتعرضو للاخصاء السياسي كايتحيدو ليهم العراوي وماكايبقاوش قادّين يناقشو المواضيع الاقتصادية و السياسية كايرجعو يقابلو غا العيالات فحال شي گلاسة فشي حمّام ! لا لعمل المرأة ! لا للزواج بالموظفة ! لا للاختلاط! لا للعري ! آري ليا صاكي آ ختي الزّاهية

سهام البارودي – كود//

الخوانجية فالعالم كامل معروف الموضوع المفضل ديالهم هوا المرا ! غي كاتحفى لبوهم الجرية كايرجعو للعيالات ! فالمغرب السلفيين و الخوامجية مؤخرا حاسّين براسهم تعرضو للاخصاء السياسي ، تحيدو لباباهم العراوي ، ماحيدهم ليهم حد طبعا حيدوهم لراسهم براسهم بالتجارب ديالهم الفاشلة فالحكومة و على ارض الواقع ! لقاو راسهم تعرّاو قدّام الناس و مابقاتش عندهم الشرعية باش يناقشو لا اقتصاد لا سياسة و هوما يرجعو لداكشي لي كايعرفو يديرو  يتگابلو مع العيالات !

خرجوا لينا عاوتاني بدوك الافكار ديالهم الخامجة ديال “بنتي لنتذهب للمدرسة ” ” لا لعمل المرأة” “لا للزواج بالموظفة” “لا لاعطاء المرأة حق الشهادة”

قد مّا كايموت الخوانجي على المرأة ! قدّما كايموت منها و كايخاف منها هادشي علاش كايحاول بگاع الطرق يقمعها و يخليها تحت السباط !

و فاش كايحس براسو مابقاش صوتو مسموع و مابقا تاواحد كايخاف منّو حيت مابقات عندو قيمة، كايدور البارابول جيهت المرا لي كاتجيه حيط قصير ساهل يطلع فوق منّو و يخلق الاجماع عليه ! خصوصا الى كان المجتمع اصلا مجتمع مقودة عليه و كايعاني من الجهل و الذكورية و بروبليم النّيك، مع بزاف د الحقد المنوي، هنا كاتكون الأرضية خصبة لتقبّل الهضرة الخامجة د الخوامجي ! و كايقواو دوك les idiots et les idiotes utiles !
دوك لي كايعرفو غا “الشرع عطانا ربعة ” و “تجلس فدارها تقابل ولادها” ” و العيالات خدامين و الرجال مالقاو خدمة” و دوك الافكار لي كاتخرج من القوادس د الواد الحار !

إقرأ الخبر من مصدره