احمد الطيب – كود الرباط//
واش كاين شي مشكل أو حلقة مفقودة فالدبلوماسية المغربية بأوروبا؟ واش شي حاجة فلتات ومفراسهمش؟ ما يمكنش يكون التصويت على القرار الأوروبي لي واخا ماشي ملزم بداك العدد الكبير لي قريب يكون بالاجماع لولا رفض نواب اسبان خصوصا المحسوبين على الحزب الاشتراكي العمالي التصويت لصالح القرار الللي دار ادانة كبيرة للمغرب فيما يتعلق بحرية الصحافة والاحتجاج.
واش كامل هاد البرلمانيين ضد المغرب؟ واش كلهم خدامين مع لوبيات ضد مصالح المملكة؟، الجواب : موحال، وحتى يلا كان الجواب بصح خدامين مع لوبيات ضد مصالح المملكة، فين اللوبيات ديال المغرب، في السفراء وفين الدبلوماسيين والعلاقات الخارجية؟
باش يتنصل وزير الخارجية ناصر بوريطة، من الفشل الذريع في اقناع ولو بعض النواب فالبرلمان الاوربي، بغا يلصقها فحزب ماكرون لي صوت مع القرار. هادشي كيتروج فالبرلمان المغرب.
نجيو بلغة الأرقام لي صوتو على القرار هوما 356 نائبا مقابل 32 اعتراضا و42 امتناع، راه المئات اسي بوريطة لي صوتو مع القرار، راه كثر من 350 نائب اوروبي يا معارفش على المغرب يا مكاينش تواصل معهم، يا وزارتك ممسوقاش لهادشي كامل.
فحتى فردود الافعال، وزارة الخارجية كانت معطلة بزاف، شفنا أول رد كان من المجلس الأعلى للسطة القضائية، لي دارو بيان مطروز ومقاد وبلغة قانونية قوية. رد على البرلمان الاوربي بالقانون وبسيادة السلطة القضائية بالمغرب.
من بعد بداو تحركات ديال بوريطة، بعدما تعطل بزاف، وبدا كيصيف مساجات لبعض الصحافيين كيقولوهم هادو عناصر ونقط من موقف الخارجية ولكن بلا ماذكرو بلي هذا موقف ديال الخارجية ومتنسبوهاش لشي مصدر دبلوماسي، وانما نقط ديروها فمقالاتك. اهانة للصحافيين، باغي يردهم بوريطهم موظفين عندو. اهانة ماشي حقاش عطاهم بريفين. اللا. اهانة لان ناسو كيقولو دوز هاد الشي كيف هو.
السفير السابق عبد القادر الشاوي، كان وضح مزيان فندوة الاسبوع الفايت بمجلس النواب، بلي الخارجية المغربي كتعاني اختلالات كثيرة، وكشف بلي عدد من الدول معارفينش المغرب ومعندهمش صورة على بلادنا، وزيد عليها غياب المهنة وضعف الأداء الدبلوماسي.
بوريطة وفي لشخصيتو. ايلى الدولة ربحات ديبلوماسيا كيرجعها انتصار ليه هو. كيخرج يهدر ويدير الندوات ويتحرك. باش كيكون شي ضربة للبلاد كيرجع اللاور. هادا سلوكو وديما كيصرفو بهاد الطريقة.
Laisser un commentaire