النقاش دعمل المرأة كاين غا فالفايسبوك أما الواقع حسم فيه شحال هادي! الأغلبية الساحقة د المغربيات لّي جالسين فالدّار هوما براسهم كايشجعو بناتهم باش يقراو ويخدمو ويكونو مستقلّات ماديا؟ حيت عارفين خروب بلادي! والرجال الآباء حتى هوما! كلشي عارف الواقع شنو فيه والله يمّاك وماتكون عندك الاستقلالية المادية ديالك فلوسك صاليرك ديالك حتى تعيشي العذاب فأغلب الأحوال ‎‎

سهام البارودي – كود//

هاد النقاش د عمل المرأة راه كاين غي فالفايسبوك أما الواقع حسم فيه شحال هادي! سنوات والمغربيات جالسات فالديور ماعندهمش استقلالية مادية، قرون وقرون وقرون والمرا  كاتعيش تحت الرحمة د الراجل بغا يعطيها يعطيها مابغاش يعطيها مايعطيهاش! بغا يطلقها يطلقها مابغاش يطلقها مايطلقهاش! بغا يوكلها بغا يكسيها بغا يسيفطها للحمّام لّي بغاها هوا هي لي تكون وهي ماعندها رأي ماعندها قيمة وإلى ماعجبهاش الحال يسيفطها فحالاتها ولا يتجوج عليها… الحمّام هوا اللخر كانو المغربيات كايهزوّ ليه الهم ومازال بزاف د المغربيات كايهزو ليه والأزمة د كورونا بينات بشكل واضح الفقر المدقع لي كايعيشو فيه بزاف د المغاربة ولي الدوش والشوفو ماداخلش فالقاموس ديالهم! مازال، باش يغسلو الحل الوحيد لي عندهم هوا حمًام الزنقة !

الواقع حسم شحال هادي فالموضوع ديال عمل المرأة والاستقلالية المادية ديالها والعيالات براسهم، ربات البيوت هوما لي كايدفعو بناتهم باش يخدمو ويتحركو ويكون عندهم بزطامهم فيه فلوسهم، ربات البيوت لي كاتلقاها كاتقول لبنتها ماديريش الغلط لي درت أنا! قراي أبنتي وخدمي والزواج غادي يجي غادي يجي… العيالات لي هزّو القالب ومابغاوش بناتهم يهزّوه تاهوما !

و حتى الرجال! الآباء اليوم واعيين بهاد المسألة، كايقيد بنتو فالمدرسة وكايحلم تولي ليه أستاذة ولا محامية ولا طبيبة تاهوا، ويكون عندها منصب وعندها مستقبل، راه كايشوف بعينيه البنات بوليسيات وقايدات وسيدات أعمال وكايبغي تاهوا يشوف بنتو فشي منصب! الرجال براسهم عارفين قوالب الرجال وعارفين علاش ضروري بنتو تخدم على راسها !

الاستقلالية المادية بعدا عاد الزواج والاولاد حيت عارفين الآباء والأمهات بالتجربة ديالهم وبشنو كايقول الواقع بلي الحياة كاتبدل والناس براسها كايبدلو وبلي كيما كاين الزواج كاين الفراق وحتى واحد ماكايبغي بنتو تتشرد لا خطاها الراجل.

إقرأ الخبر من مصدره