ننساو علينا البرلمان الاوربي. واش ما وصلش الوقت نطيو صفحة توفيق وسليمان وعمر. بلاد دومي فينال فالمونديال ما توحلش تلقى حل للصحافيين وما نخليو حد يلوي دراعنا وحنا عارفين باللي ماشي همهم حرية التعبير

كود هناء ابو علي ///

السيمانا للي فاتت وجه البرلمان الأوروبي الخميس انتقادات شديدة لينا بخصوص حرية الصحافة فبلادنا. البرلمان الاوربي طالب بالافراج على توفيق بوعشرين وسليمان الريسوني وعمر الراضي وشدد على “بوضع حد للتحرشات ضد جميع الصحافيين في البلاد”. شفنا مراسلون بلا حدود فرحانة بالقرار الاوربي واخا غير ملزم للاتحاد الاوربي وغير مؤثر على العلاقات بينو وبين الرباط.

شفنا الرد المغربي ركز بشكل اساسي على “استقلالية” القضاء و”حقوق الضحايا” في التقاضي وباللي هاد الصحافيين ما مشدودينش على حرية التعبير ولكن عندهم قضايا “قضايا جنائية”.

دابا عارفين ان البرلمان الاوربي ما كيهمو لا حرية التعبير ولا حرية الصحافة. توفيق بوعشرين غادي يوصل 5 سنين دالحبس ف26 فبراير المقبل اي 3 العقوبة اللي تحكم عليه دوزها. الصحافي سليمان الريسوني تحكم عليه ب5 سنين وف22 ماي 2023 غادي يكون دوز 3 سنين اي كثر من النص وعمر الراضي تحكم عليه 26 يوليوز 2020 تحكم عليه ب6 سنين اي قريب يوصل حتى هو نص المدة. 

طبعا وحدين دوزو ثلث او كثر من نص المدة عاد ينوض البرلمان الاوربي يدين المغرب راه باينة القضية فيها امور سياسية ما عندها علاقة بحرية التعبير. لو تعرض المغرب للادانة وقت الاعتقال كان داك الشي مفهوم. 

دابا خلينا من البرلمان الاوربي. ملف هاد الصحافيين الثلاث ومعاهم معتقلي حراك الريف خاصو يلقى حل. راه شفنا 4 احزاب سياسية فبرامجها الانتخابية طالبات بانفراج عبر اطلاق سراح الصحافيين الثلاث وناس الحراك. هاد الشي دافعات عليه الاصالة والمعاصرة والاستقلال والتقدم والاشتراكية والعدالة والتنمية فالحملة الانتخابية لاخر انتخابات تشريعية. وكاين جمعيات مغربية كطالب من مدة بنفس المطالب، اي هادو احزاب سياسية وجمعيات حقوقية مغربية كيشوفو ان اعتقال الصحافيين الثلاث وناس الحراك هي “قضايا سياسية” خاصها معالجة بالعفو الملكي ونطيو الملف. دابا هاد العفو ممكن خاصة انهن دوزو اما ثلث المدة او نصها او تقريبا الثلثين. 

واش مغرب نص نهاية كأس العالم ما قادرش يلقى حل لعمر وسليمان وتوفيق وناصر وصحابو؟ طبعا قادر. 

علاش نخليو جهات او مؤسسات دولية سوا بحال البرلمان الاوربي او مراسلون بلا حدود او جمعيات معروفة كيفاش تتحرك ووقتاش وعلاش٬ تحل فمها علينا. 

دابا شي مسؤولين مغاربة اللي رافضين ايجاد حل لهاد الملفات غادي يلقاو مناسبة باش يزيدو يتشددو. غاديين يعتابرو باللي القرار الاوربي كيعني باللي ما كاينش شي اعتدال فهاد القضايا. هاد المسؤولين كيخربقو. هاد الصحافيين المعتقلين ما عندهم يد فهاد القرار الاوربي وبلادنا كبيرة على هاد اللعب. المغرب كبير وقادر يلقىِ حلول لقضايا معقدة بزاف ما بالك بحال هاد القضايا. ولقاو حل وخليو توفيق وسليمان يشوفو ولادهم وعمر يشوف باباه وماماه

إقرأ الخبر من مصدره