اسماء غربي- كود//
طاليس جاب الربحة فحفل تكريم فوزي القجع طاليس، بواحد سكيتش قدمو زلق بيه زلقة خايبة جابت ليه الانتقادات والتنمر واتهموه بإهانة المرأة المغربية وقالو عليه الحامض ومتطفل على المجال وقليل الحيا.
فهاد السكيتش قال انه بكثرة انتصارات المغرب فالمونديال شبع تعناق فالبنات اللي كيتفرجو معاه وقال انه كون تأهل المغرب للنهائي كون حملات شي وحدة منو تما بكثرة التعناق والبوسان.
اولا الكوميديا تدارت باش تناقش الطابوهات والممنوع والمحظور ،وفأما ماله علاقة بإهانة المرأة المغربية، طاليس ماجبد لاتحرش ولا اغتصاب ولا حتى شي حاجة كتقيس المرأة المغربية، والمغربية كتتهان فابزاف دالمجالات وبزاف دالبلايص واللي كنديرو راسنا مكنشوفوهاش وماشي عاد جا طاليس وهانها.
وهو فالحقيقة بغض النظر على الجودة ديال السكيتش وواش كيضحك ولالا راه هو غير انعكاس ديال افكار المجتمع اللي عندنا اللي ناقصو الحب والحنان والعناق واللي لقا المونديال فرصة و مناسبة باش يعنق ويتعنق بالنسبة للمرأة والرجل على حد سواء ومعندها حتى علاقة بالمرأة رخيصة ولا غالية لأننا بهاد الطريقة مزال كنكرسو أفكار المجتمع الذكوري
Laisser un commentaire