كود الرباط//
سوء تنظيم وشوهة فالتواصل، هاد الشي وقع فاللقاء لي جمع بين الباطرونا ديال المغرب مع ديال إسبانيا، فالقمة الثنائية الكبيرة لي كتجمع البلدين فهاد اليومين.
هاد سوء التنظيم بدا فالأول مع الصحافيين اللي تمنعو يدخلو ياخدو التصريحات ومنهم مراسل ميدي 1 سات، واخا دخلو وسائل الإعلام العمومية وبعض الصحف الإلكترونية، وسالات هاد الفضيحة بالميكرو فاش بداو مسؤولين إسبان ومغاربة يهضرو فيه كيتقطع الصوت.
هادشي وقع مساء اليوم فالقاعة المخصصة للندوات بفندق ماريوت لي فالمول ديال رباط سانتر.
تقطع الصوت كثر من مرة، وسط حضور كبير من صحاب الشكارة ديال إسبانيا والمغرب وحضور للصحافة الدولية والقنوات الإسبانية، وبحضور الوزراء.. للي شدو التنظيم والتواصل دارو فضيحة لبلادنا وشوهو بصورتها، مع العلم أنه كاينين أطر ومهندسين صوتيين مغاربة قادرين يديرو احسن تنظيم.
الخلاصة شوهونا قدام الصبليون، وزادو عليها الترجمة دارو فيها جوج لغات فقط الفرنسية والإسبانية، ونساو الانجليزية والعربية، الاخيرة لي اللغة الرسمية.
https://fb.watch/iqfbRHblLo/?mibextid=cr9u03
Laisser un commentaire