شقيق أسماء المنور: الوداد عندها رئيس حسن من الرجاء ولكن الخضرا كتشرف المغرب فالمواعيد الكبرى

كود سبور//

إقصاء الوداد الرياضي من ربع نهائي كأس العالم للأندية البارح السبت على يد الهلال السعودي بضربات الترجيح فتيران المجمع الرياضي الأمير مولاي عبد الله بالرباط، خلف بزاف ديال ردود الأفعال وكلاشات ما بين الوداديين والرجاويين على شكون هو أفضل ممثل ديال الكرة المغربية بالمسابقات القارية والعالمية، مع العلم أن أحسن إنجاز ديال الكرة المغربية فالموندياليتو هو للرجاء الرياضي عام 2013 ملي كان محمد بودريقة رئيس للنادي.

وسط هاد البلبلة والشدان ما بين الوداديين والرجاويين خرج المنخرط الرجاوي ياسين المنور شقيق الفنانة المغربية أسماء المنور اللي حتى هي منخرطة فالرجاء، وتكلم بواحد الطريقة فيها إنصاف للفريقين بالنظر للواقع الحالي والتاريخ.

وقال الرجاوي المنور: “هاذي حقيقة خاص يتقبلوها الوداديين و حتى الرجاويين.. حاليا الوداد كتسيّر أحسن من الرجاء، عندهم استقرار في رئاسة الفريق رغم عيوب التسيير الانفرادي، عندهم رئيس قادر يحط جوج المليار فخزينة النادي بلا قوّة الهضرة ويجيب أفضل لاعبين لفرقته”.

وكمل المنور وقال: “وفي المقابل هاذ المناسبات الكبيرة اللي كتكون واقفة عليك البلاد تهزّ ليها الراس كتعرف ليهم غا الرجا وكيفما كانت الظروف، كتلقانا معاضّين ومقاتلين ما حد الروح كتطلع وكتهبط”.

https://m.facebook.com/story.php?story_fbid=pfbid0dRDfazbP4UsHRCCsGUCs7u52JN96dd19UqqYb31e4GibSZ4KJdbdEbzZsF3jLK8Kl&id=1319682563&sfnsn=mo&extid=a&mibextid=RUbZ1f

إقرأ الخبر من مصدره