ففرانسا الانسان كايشري دار حيت جمع شوية د الفلوس و بغا يستثمرهم ! فميريكان كاتلقاه شرا الدار حيت صاحبتو حاملة و قرر يتجوجو و يشريو دار ! فالمغرب كاين الهوس د الدار كلشي باغي يدير الدار حتى لي ماعندوش ! كايقوليك ” الخوت بغيت ندير شي دويرة راه قهرنا الكرا” كيفاش آبوقال قاهرك الكرا لي كرا يمكن تبدلو فأي وقت و ماغاتقهركش الطريطة د البانكة !

سهام البارودي – كود//

كاين واحد الهوس جماعي عند المغاربة مع الدَار ! تاواحد مابقا باغي يكون كاري كلشي كايقلب يدير “الدّار ” حتى دوك الطبقات المقودة عليها كاتلقاه تاهوا كايقوليك الخوت بغيت ندير داري راه قهرنا الكرا ! انا هاد الجملة بالضبط ماعمرها كاتفهم ليا، كيفاش باغي دير دارك و نتا الكرا لي كرا و ساهل انك تبدلو و ساهل انك تحبسو و ساهل انك تهرب عليه گاع ( طبعا ماكانشجعكش تهرب) و ماقاديتيش عليه عاد الدَار لي دار ! طريطات د البانكة و مصاريف و اصلاحات و ضريبة د السكن كيفاش ؟

بزاف د المغاربة كايموتو بالجوع باش يديرو الدار ! كايحيدو من فلوس ولادهم و ماكلتهم و قرايتهم و شرابهم باش يبنيو الحيوط و يطلعو ايجاط فوق ايجاط ! عوض انه يستثمرو فالقراية د ولادهم مثلا !
منين جاي هادشي ؟ من بزاف د العوامل و أولها عدم الثقة لي عند المغربي فالدولة ! عارف راسو خاصو يجمع الفلوس و يديرهم تحت منو و يبني الدار و يحاول يكون مستقل بذاتو قد ما قدر ! حيت غدا و لا بعدو مع أول طارئ غايلقا راسو كايسعى ! شي كسيدة و لا شي مرضة كفيلة انها تقلب ليه حياتو و تخلي ولادو يتشردو ! الفلوس لي نورمالمو خاصهم يساهمو فعجلة الاقتصاد و يتخسرو فالترفيه و الثقافة و الرياضات و السفر و المتعة كايديرهم تحت الجليجة و يقرم عليهم ! ماكايستافد منهم هوا ماكايستافدو معاه عباد الله !

و حتى نهار كايبغي يدير شي استثمار كايبقا حابس فدوك الاستثمارات التقليدية ! يشري شي دار يكريها ! يحل قهوة ! يحل سناك … دير الماكلة هي لي كاتمشى ! دير شي حانوت د حوايج العيالات حيت العيالات ديما كايشريو الحوايج ! ماكاينش شي ابداع فالاستثمار ! حتى رجال الاعمال الكبار فالمغرب استثماراتهم بسيطة و كلاسيكية بزاف هادشي لي كايخلي الاقتصاد المغربي ماعندوش شي قيمة مضافة كبيرة ! راه لي خلا ميريكان تكون ميريكان هوا القدرة ديالها على تشجيع الافكار الجديدة و البحث العلمي ! علاش گووگل و فايسبوك و امازون و اير بي اند بي كلهم انطلقو من افكار بسيطة بزاف و لكن لقات العقليات لي كاتعاونها ! حنا لا ! حتى من الناس لي عندهم الفلوس عندنا استثماراتهم بليدة ! وزين د السردين ! فابريكا د الحوايج ! صونطر دابيل …

نفس العقلية لي عند المغربي البسيط ! عند رجال الاعمال الكبار ! و عند الدولة براسها ! كلهم واحلين فهاذا ما وجدنا عليه آباءنا ! المغربي البسيط باغي يحط فلوسو فالياجور ! و رجل الاعمال باغي يحل شي قهوة و الدولة كاتجيب الاستثمارات ديال الدراع لي الدول المتقدمة ولات كاتحيدها عليها من ارضها و تسيفطها لدول اليد العاملة فيهم رخيصة بزاف !

إقرأ الخبر من مصدره