بإسم رضاة الواليدين كتلقى أسر فتية كتشتت والأطفال كيضيعو حيت أحد الأزواج عندو إلتزام مع واليديه خاصو يصرف عليهم، حقا هوما ولدوه وتكرفصوا وتعذبوا عليه، ولكن أنك تجيب إنسان في هاد الحياة باش يكون هو التقاعد ديالك هادي راه أنانية ونوع من العبودية المبررة برضاة الواليدين

محمد سقراط-كود///

بزاف ديال الشباب والشابات المغاربة لي عندهم أسر أو لي غير بوحدهم كتلقاهم متقلين بالمصروف على واليدهم، كيكون الواحد عندو صالير بسيط وغير مقاتل مع الوقت وحتى هو عندو آمال وباغي غير يعيش مرتاح شوية ولكن كتلقاه مكتلف بواليديه هوما ينتفوا من جيه والحياة تنتف من جيه وهادشي على حساب راسو وأسرتو، شحال من واحد كتلقاه كيشد مثلا 5000 درهم كيسيفط لواليده منها على الأقل ألف درهم للشهر، أما البنات كاين لي مستعبدينهم واليديهم كتلقى أغلب صاليرها كيمشي غير على واليديها حتى تزوج، وكاين حتى ملي كتزوج كتبقى تصرف صاليرها على واليديها وتسنى الراجل يصرف عليها عوض يتعاونوا على الزمان بجوج ويشوفوا حياتهم كأفراد ويلبيو إحتياجاتهم، وكتلقاهم حارمين ولادهم لي ولدوهم بإختيار منهم من حاجات مهمة باش يسيفطوا الفلوس لواليدهم لي ولدوهم بلا مايتشاورو معاهم بلا مايقدموا ليهم حتى شي حاجة في هاد الحياة، الخبز وأتاي والدواز والمرقة ديال الدجاج والخضرة والليالي تدوز بالقطنية والسلاخي ديال العصلا وتشيار بالصنادل والتصرفيق والضرب والغوت راه ماشي حاجة لي خاص يجازي الواحد واليديه عليها أو دين في رقبتوا خاصو يردو ليهم شي نهار.

هادشي كامل بإسم رضاة الواليدين كتلقى أسر فتية كتشتت والأطفال كيضيعو حيت أحد الأزواج عندو إلتزام مع واليديه خاصو يصرف عليهم، حقا هوما ولدوه وتكرفصوا وتعذبوا عليه، ولكن أنك تجيب إنسان في هاد الحياة باش يكون هو التقاعد ديالك هادي راه أنانية ونوع من العبودية المبررة برضاة الواليدين، خاص الأباء يكونوا مستقلين على ولادهم ودارين في حياتهم علاش يرجعوا والى ماقدروش مايولدوش، علاش الواحد يكون غارق فيلا البؤس ويزد يجيب زوج أو زوجة يكرفصهم معاه وفاش يكبرو خاصو يجازيهم على هاد الجريمة، علما أنهم ماشي كيكبروهم رجال أعمال وأطباء ومهندسين وكيساعدوهم عبر التعليم أو طرق أخرى أنهم يترقاو اجتماعيا باش يجي واحد الوقت يردو ليهم غير شوية، هاد الحالات كاينين ديال أباء مكافحين مناضلين ديال بصح تقطعوا على ولادهم باش كبروهم وقراوهم وضحاو من أجلهم، ولكن هادو قلال بزاف الأغلبية بحال لي كيلوح الزريعة في البلاد البور وكيبقى يتسنى الشتا.

كنت كنعرف حالات ديال أطفال صغار عندهم خمسنين وست سنين واليديهم من مناطق نائية نواحي إيجوكاك ونواحي أزيلال كيسيفطوهم يسرحو في الرحامنة عند ناس حتى هوما فقراء ولكن على الأقل يقدرو يخلصو 200 درهم في الشهر أو 300 مقابل خدمات الطفل لي كيكبر معاهم في الدار، علما أنه ماعمرو كيشوف هاد الفلوس كي دايرة حيت كيجي السمسار كيجمع الفلوس من بزاف ديال الناس في القبيلة ويديهم للمنطقة منين جاب الدراري، وهادو نيت وبحال حتى فاش كيكبرو كيخدمو في البني أو أي خدمة ديال تمارة وكتلقاه جزء كبير من مدخولو خاص يسيفطو لواليديه لي كيتسالوه في هاد الحياة فقط أنهم ولدوه، وهادشي عاطينا جيل ديال الشباب ولاد الشعب ماقادرينش يزيدو في الحياة لأنهم مكبلين بأغلال رضاة الواليدين، بينما ولاد لي لاباس عليهم واليديهم لي مرضيين معاهم كيبقاو يدفعوا في ولادهم ويعاونوهم حتى يوصلو لبر الأمان على عكس المزاليط ولادهم غارقين وكيزيدو يغرقوهم.

إقرأ الخبر من مصدره