مغاربة وليدات فرنسا باغيين يعطيوها دور ماشي ديالها وكبر منها.. كوليكتيف عامر بيهم وباوروبيين اغلبهم ضد المغرب اقتارح عبر صحيفة “لوموند” باش تدار كونفيرونس فباريس وبرعاية فرنسية يحضرو فيها دول العالم ويلقاو حل لنزاع الصحرا باش ماتنضوش الحرب بينا وبين الجزاير..

كود – عن “لوموند”//

واحد الرباعة مسميين راسهم “كوليكتيف”، وقعو تريبون ف”لوموند”، ووطلبو من خلال الصحيفة من دول اوروبا كثر دالإنخراط لمنع حرب محتملة بين المغرب والجزائر، بسبب قضية الصحراء المغربية وبغاو فرنسا تلعب دور اكبر فهادشي.

هاد الكوليكتيف اللي متكون من بعض الاروبيين اللي بزاف منهم مكيحملوش المغرب او عندهم معاه مشكل، بحال اگناسيو سيمبريرو، ومن بزاف ديال المغاربة ولاد فرنسا ومع فرانسيس وكيطغطو على المغرب بهاد الفيلم ديال المغرب والجزائر، بحال بوبكر الجامعي.

وكتب هاد الكوليكتيف، وفق ما نقلاتو صحيفة “لوموند”، ان حتى واحد ماراضي على الوضع الراهن القائم حاليا، بعدما فشل المنتظم الدولي فيلقى حل لنزاع الصحرا. وحيت العواصم الأوروبية كتلعب مواقفها بين المغرب اللي حقق نجاحات دبلوماسية غير مسبوقة، وباغي كثر من الإعتراف بمغربية الصحراء، و بين الجزائر، اللي كتدعم البوليساريو، وحيت قالك باريس ومدريد، على وجه الخصوص، كيدفعو ثمن العداء بين الجزائر والمغرب.. اقتارحو هاد الناس ان الدول الأوروبية تشارك بشكل أكبر فحل النزاع، وبشكل أخص فرنسا اللي هي اللي رسمت الحدود المغربية الجزائرية الحالية.

وقالو ان فرنسا خاصها تلعب دور اكبر فالنزاع، وعلاش لا تحتاضن ندوى على هادشي فالعاصمة باريس، ويحضرو فهاد الندوى ممثلين من الاتحاد الافريقي، والاتحاد الاوروبي وغيرهم وتحاول فرنسا تقنع المغرب والجزائر انه ماشي ضروري شي واحد يربح! وتقنعهم يبعدو من الشوفينية الزايدة…

هاي هاي على فرنسا غادي دير هادشي كامل! وعلاش؟ اش دخلها؟ واجابها؟ وشكون هي باش تلعب هاد الدور الكبير نيت؟ ماهي مريكان، ماهي شي دولة بصح قوية وعندها باش تظغط، الطوب دشنو قدرات دير لحد الساعة هو ماتعطيش بزاف دالڤيزات للمغاربة…

كون هاد الناس.. هاد الكوليكتيف، بغاونا بصح نتافقو معهم، وناخدوهم بمحمل الجد، كون بعدا اقتارحو مريكان او اي دولة اخرى من غير فرنسا.. ولكن كوليكتيف عامر بولادها مايمكن الا يدفعها هي كحل.

تحل بكري هاد النزاع!

إقرأ الخبر من مصدره