على مايبدو كل منتوج في السوق عندو جوج ديال الأثمنة واحد في الواقع والتاني مضوبل في فايسبوك اللحم داير حسب الفيديو التنويري ديال كود 65 درهم في سلا بينما في الفايسبوك واصل 120 درهم وباقي يزيد هاد الكذوب والوش طالقينهم ناس كيتمناو توقع المجاعة في المغرب باش يبانوا عندهم الحق

محمد سقراط-كود///

على مايبدو فراه كل حاجة في السوق المغربي عندها جوج أثمنة مختلفة واحد في الواقع وواحد في الفايسبوك، مطيشة دايرة 7 دراهم في الواقع وفي الفايس دايرة 12 ، بطاطا دايرة 6 وفي الفايس دايرة 10، التفاح هذا ثمنو مضوبل في الواقعلا بعشرة دراهم وفي الفايس بعشرين ، الجبلانة منقية دايرة 13 غير خود وطيب مع راسك متنقي ما والو، في الفايسبوك راها مفقودة من السوق هادي شي عامين، والمشارك في البطولة هاد الأيام هو اللحم، حيت البطلة الرئيسية ديما هي مطيشة، ولكن هاد المرة حتى اللحم دخل للمنافسة، اللحم في الواقع داير حسب الفيديو التنويري لي دار موقع كود داير 65 درهم، في الفايسبوك واصل لمية وعشرين درهم للكيلو وباقي غادي يزيد يغلى، في نفس المنشور كتلقى واحد كاتب أنا خديتو بسبعين من مكناس لاخر كيرد عليه هاديك غير البقرة المريضة لحم لعجل خديتو بمية درهم من فاس، كيجي خاي حمد الطنجاوي لي أصلا اللحم ديما داير عندهم هاد الثمن أيام الرخى ولغلى وكيزيد شي عشرين درهم من عندو فوق هاد الثمن.

وبزاف منهم كتلقاهم غير مراهقين عمرهم دخلو معاهم حتى خبزة للدار، وحتى فاش كيتسخرو للدار من عند الكزار مكيسولوش على الثمن حيت هوما من دوك صحاب قاتلك ماما عطيها وعطيها حتى دوز وتخلصك، حيت مو وماتيقاش فيه تعطيه الفلوس تخايف تبقى بلا تقضية بلا دري يزيد مايرجعش، تسخرو يجيب التقدية تلقاه تديبلاصا مع الفرقة وكلا شي قتلة وتشد في الكوميسارية، وفي الفايسبوك يبقى يغوت لا للغلاء، بحال هادو مفهوم تصرفهم ولكن هادوك لي كبار وبعقلهم وفرحانين لهاد الغلاء باش يفكرونا كل نهار بلي البلاد غادا للهاوية واخا راه العالم كيشوف العكس، البلاد مامشاتش للهاوية في كورونا وتلث شهور ديال السدان ومماماتوش الناس بالجوع وتعاونوا المغاربة بيناتهم بواحد الشكل كبير ومبهر الصراحة وبانت بلي البلاد واقفة على الصح وماشي غير شي عزبة ديال الله يحسن لعوان.

الغلاء كاين وواقع والتضخم كاين وواقع والطريقة دالمقاومة ديالو هي إما المقاطعة أو الخروج للشارع بالنسبة ليا وتما لي مضرور راه غادي يبان بصح، أما باش الكذوب والوش والمزايدات الخاوية غير باش يقنعونا شي وحدين بلي البلاد غادا للمجاعة والحروب والثورة وخاص شي حل، وخاص نحيدو الفلوس لأخنوش ونعطيوها للدراوش ياكلوها ويبقاو يشوفوا في بعضياتهم من بعد، هادشي غير تعمار الشوارج أخنوش وبحالو راه رحمة في البلاد برجوازية محلية ملايرية عندهم شركات وممتلكات وراس المال خدام كيتروج في السوق يكونوا كيق مكانوا حسن من شركات متعددة الجنسيات تدخل تعوضهم متعرف حتى شكون تسب وتعاير فيها، وتدخل للسوق بحال شي طفيلي غير تمص دم المغاربة دولة وشعبا ونهار يبان ليها بديل تهبط الريدة وتزيد وشد فيب البولة داك الساعة.

إقرأ الخبر من مصدره