سهام البارودي- كود//
فگروبات السكن فالمغرب و السكن الاقتصادي عموما ! الموضوع المهم لي كلشي كايهضر عليه هوا الكريدي ! ويلي الكريدي حرام ! ويلي ماتاخدش الكريدي ! واياك الكريدي ! عنداك الكريدي راه ربا ! فاذنوا بحرب من الله و رسوله ! و دوك المنشورات ديال “عاودو ليا على كيفاش تبدلات حياتكم مورا ماخديتو الكريدي :(” مع شي ايموتيكون حزين ! و كاتلقا بنادم كايكومونطي ” حياتي عذاب اختي من نهار خديت الكريدي وانا مريضة ” ” تكرفصت اختي ندمت حيت خديت الكريدي ” و لا دخلتي و قلتي ليهم بيخير الحمد لله خديت كريدي شريت داري و كانخلصو كلشي هوا هاداك مايحملوكش ! لا هوما بغاوك تقوليهم داكشي لي بغاو يسمعو و هوا الكريدي خايب !
بزاف د العائلات المغربية شاريين الديور بالكريدي و بانيين الڤيلات بالكريدي و بيخير وعلى خير ! صحتهم بيخير ! وليداتهم كايقراو مزيان ! الاسر ديالهم مستقرة ! و بزاف د رجال الاعمال كايديرو كريدي باش يستثمرو ! الاقتصاد الحديث كلو مبني على الكريدي و سير نتا قنع ام هداية و راجية رضى الرحمن بلي الناس عايشين بالكريدي والله مفيض عليهم الخير و الخمير !
الكريدي ماشي عيب و ماشي مشكل ! الكريدي حاجة طبيعية ! لي كايخليه يكون مشكل هوا انه الانسان فالاساس مايكونش قادر عليه ! يعني عندك مدخول محدود و غير مستقر و كاتلاح باش تاخد كريدي ديال دار معلوم ما حياتك غاتولي عذاب و بؤس و شؤم حيت غادي كاتلاح بلا گرصون لشي حاجة كبيرة عليك ! اما انسان عندو دخل قار و كافي علاش ماياخدش كريدي يعاون بيه فالشرا ديال الدّار ؟
و لكن للاسف الهيبوش لي معمر گروبات السكن الاقتصادي ماكايفهمش هادشي ! هوا باغي يربط المرض ديالو بالكريدي ! و الفشل ديالو بالكريدي ! و البؤس ديالو بالكريدي !
و واخا تقوليه انا خديت كريدي و بيخير كايقوليك لا راه يمهل و لا يهمل ! زعما غا وجد كرك العصا !
Laisser un commentaire