“مصيبة ماكانتش فالحسبان” “بكيت حتى شبعت اليوم” ” وصلت انا و راجلي للطلاق الله ياخد الحق ” هادو هوما الڤيديوات لي كايضربو مشاهدات بزاف فيوتوب علاش ؟ حيت بزاف د المغاربة كايتلذذو باخبار المصايب و المرض و البؤس باش يبردو على راسهم و مايحسوش براسهم بوحدهم لي مقودة عليهم

سهام البارودي – كود//

الانسان بصفة عامة كايحس بالحزن اكثر من ماكايحس بالفرحة ! يقدر يفرح جوج دقايق ساعة نهار و لكن الى حزن غايبقى حزين بالسيمانة جوج بالشهور… كاين واحد القابلية للحزن عند الانسان بصفة عامة و هادشي معروف فعلم النفس و عندو اسباب نخليكم تكتاشفوها فگووگل! و لكن هاد القابلية للحزن طالعة عند الاغلبية د المغاربة ! دابا دخل لشي گروب تقوليهم ” شريت طوموبيل باركو ليا ” ” شريت داري الجديدة غانوريكم التصاور” غايجاوبوك شي عشرة د الناس لي يمكن يتفاعلو معاك ! و لكن الى حطيتي تصاورك مخلية دار بوك و عينيك مزرگة و كاتقوليهم اخوتي سلخوني شي وحدين فالزنقة كلشي غايبغي يتفاعل معاك و يسمع كيفاش سلخوك و علاش و شنو وقع ! ولكن شكون هوما المقودين فتطبيق هاد الخلاصة المهمة هادي و كاياكلو منها الخبز ! هوما اليوتوبوزات ! فإطار الدوكتورا الدولية لي كانوجد  فجامعة سد الجعبة !  كاتجي اليوتوبزة كاتلوح ڤيديو واحد فيه خبر زوين مثلا:

” جولة فالڤيلا ديالي ! و أخيرا حققت الحلم و بنيت بيت الأحلام”

و لكن ضروري مورا هاد الڤيديو تبعو بشي خمسة د الڤيديوات اخرين

“الفرحة ماكملاتش! آجيو تشوفو المصيبة لي طرات ليا فالحمّام”

“وصلنا للطلاق! أحمد مابقاش باغي يكمّل حياتو معايا الله ياخد الحق!”

“ماكنتش متوقعة هادشي! الطبيب صدمني اليوم”

طبعا ماطرا ليها والو فالحمّام غي واحد لافويت صغيرة تحت لاڤابو و طبعا احمد ماغاديش يطلقها غي دايرين فيلم بيناتهم و طبعا الطبيب ماقاليها والو من غير فيها حبوبة فوجها خاصها تنقص من البطبوط و المسمن و الزبادي و الزيوتات

ولكن اليوتوبر كايطبق واحد القاعدة ضروري فاش تتقاسم مع المغاربة واحد لاضوز صغيرة د الفرحة خاصك تبعها بشي ضور امقودة د المصايب و المآسي باش مايحقدوش عليك و باش ماينوضوش يشيرو عليك بالمقاد و الجناوى ! هاد لاروسيط فاش كايوصل اليوتوبر يميتريزيها صافي راه ميتريزا كلشي !  بزاف د الفرحة كاتجر عليه الحسد و الغيرة و القصف و جميعا من اجل توقيف قناة فلانة و بزاف د الحزن غايجيب ليهم الملل ! داكشي علاش اليوتوبوزات كايضوزيو الڤيديوات شوية د الفرحة مع بزاف د القوادة.

هادشي علاش ؟ حيت للأسف بزاف د الناس ، النجاح ديال الآخر كايعذبهم، ماكايبغيوكش تفوتهم، طولما نتا تحت منهم او فحالك فحالك راك حبيبهم و لكن غي تزوهر عندك القضية و يحسو بيك بديتي كاتفوتهم كاتولي مامزيانش ! هاد التوازن هوا لي كايحاول يحافظ عليه اليوتوبر الناجح.

إقرأ الخبر من مصدره