زعما راه حنا كاندافعو على الدين! وا دافع غا على راسك! گاع هادو لي كاينبحو على الياس المالكي مسخنهم غا الفايسبوك! قوليهم اجيو نديرو شي وقفة حضارية على المدرسة العمومية و لا شي وقفة قدام باب وزارة الصحة آ البعابع الى جاك شي واحد !

سهام البارودي- كود//

السوشل ميديا عطات للانسان واحد القوة افتراضية و هادي حاجة مزيانة طبعا، الصوت ديال الانسان فالعالم الافتراضي راه عندو قيمة كبيرة، يقدر يأثر فالرأي العام و يقدر حتى يخلق اختلالات اقتصادية فحال داكشي لي وقع يامات المقاطعة و تضررات منه شركات كبيرة ! و لكن ! ديما كاينة ولكن! خصوصا فالبلدان لي طاغي فيها التخلف و الجهل و التعصب الدّيني ! فاش كاتكون عندك الاغلبية غارقة فالجهل راه غي عول على خزيت و ماتفرحش فاش تشوف عندهم صوت ! غايوليو اعداء للحرية و الجمال و اي حاجة مختلفة عليهم !
سينيالي يا مواطن ! جميعا من اجل القبض على الياس المالكي ! كلشي يدير ديزابوني لإلياس ! آلو الحموشي ! آلو البوليس ! و فجأة فقنا الصباح لقينا كلشي هايج على الياس المالكي ! علاش ؟ حيت خربق آية فالقرآن..

زعما راه فينا النفس حنا ! كاندافعو على كلام الله ! ماكاندافعو على تا شي حاجة اخرى و لكن كاندافعو على كلام الله ! بنادم فاسد من ساسو لراسو و ماعندوش باش يكون مواطن صالح يخدم و يخلص الضرائب ديالو و يتحاسب مع الدولة على التعليم المقودة عليه لي عندها و السبيطارات لي كايخمج فيهم بنادم ! هادشي ما كيغوتوش عليه ! بنادم ماعندوش حتى الجرأة يشوف وجهو فالمراية و يعتارف بلي راه واحد المكلخ منو ماكاين واحد المعگاز واحد الفنيان واحد الجاهل … و لكن عندو القدرة باش يسخر الفايسبوك و الكونيكسيون و يجاهد من تحت المانطة فالياس المالكي ! فحال دوك الحياحة لي كايخرجو فالصيدة د الحلوف!

و هادشي كايببن ليك معامن عايشين ! هاد الناس دابا لي محيحين على الياس المالكي و باغينو يتشد فالحبس حيت قال كلمة غالطة فآية واش كون ماكانش المخزن حابسهم واش ماينوضوش يطبقو فيه شي حد و يقطعو ليه لسانو ؟
يديروها و يفوتوها لهيه ! حيت لّي ماكايتقبلش الاختلاف راه هوا هادا ! تاهيماجيت لي بينو عليها فالسوشل ميديا راه كون ماكانش المخزن فالواقع كورا الياس دابا مصلوب حدا الكرة الارضية فكازا كايجلد فيه شي بولحية ! و مجموعين عليه الهايش مايش كايتفرجو ! اللهم ادم نعمة المخزن و احفظها من الزوال هوا لي كايعرف ليكم !

إقرأ الخبر من مصدره