فاش كتكون جاي من مدن بحال الرباط وكازا لمدينة فاس أول حاجة كتشوفها وكتعطيك انطباع أنك داخل لعروبية هي الطوبيس ديال فاس سيتي باص وهو غادي مايل وحال الكابو والدخاخن كحلة من وراه كتزيد تدخل للمدينة كتلقى افتتاح ملعب دالكولف هنا كتعرف بلي مسؤولي هاد المدينة منفصلين على الواقع

محمد سقراط-كود///

فاش كتكون جاي من مدن بحال الرباط وكازا وطنجة وبركان لمدينة فاس أول حاجة كتشوفها وكتعطيك انطباع أنك داخل لعروبية وماشي لمدينة عريقة هي الطوبيس ديال فاس سيتي باص، خصوصا الى حصلتي من وراه فشي سطوب وخاصو يدير ديبار ويكسيري باش يعمر الموطور، أولا مكتبقى تشوف والو، تانيا الى مريض بالضيقة أو الحساسية تقدر تطيح تم، أغلب الأسطول عبارة على لافيراي ديال الطوبيسات كانوا في المغرب في التسعينات، كلهم فمهم محلول على الموطور والدخان خارج والطوبيس مايل وبنادم مزاحم، العذاب الأليم في مدينة فيها جوج ملاعب ديال الكولف، ولكن مافيهاش طوبيس بحال طوبيسات كرسيف أو بركان مثلا.

المدن الكبرى كتلقى طوبيسات من شركات كبيرة مقاعد مريحة العزل مخير من الصوت والتزنزين الدخاخن قليلة ومدهزة بالكاميرات حتى فاش كيجيو الأجانب كينباهرو بيهم، في مدينة فاس لي حولوها مسؤوليها لعروبية كبيرة الى ركبتي في الطوبيس كتكون عندك أمنية وحدة هي يا ربي غير يوصل حيت راه ديما كتلقى الطوبيسات ديال فاس سيتي باص أونبان في الطريق والناس نازلين وكيتسناو وبعد المرات في بلايص خارج المدينة، أنا نيت شفت واحد أونبان في طريق عين الشكاك والناس نازلين وحايرين ودايرة بيهم الدنيا بحال شي مشهد ديال مغرب التمانينات، راه من أساسيات التمدن هو وسائل النقل تكون مواكبة وإستخدامها مكيهينش كرامة المواطن ولكن في فاس حاجة خرى بمجرد تفكر تتنقل من منطقة لأخرى فأنت معرض للإهانة والمذلة.

بعد المرات كنبقى نتسائل شنو آشمن ذنب دارت هاد المدينة باش تولي حالتها بحال هاكا، راه غير في بداية الألفينات فاس كانوا كيحلو فيها المتاجر الكبرى والإصلاحات قبل من طنجة، إيوا سير شوف طنجة دابا طلعات طلعة صاروخية بينما فاس هبطات للحضيض وكتعاني هجرة الكفائات والأطر والمجرمين والعمال المهرة الصبارين لطنجة، أسر عديدة سمحات في حياتها هنا ومشاو لطنجة سكنو في أحياء هامشية على ود مستقبل ولادهم وفين يخدمو، وبصح راه غير كيوصلوا لطنجة الدراري كيخدموا فاش مكان المهم مكيبقاوش بلاش، هنا فاس راه تشيب وماتلقاش خدمة، وماتلقاش حتى فين تخرج تبدل الجو راه فاس المدينة الكبرى الوحيدة في المغرب لي ناسها كيديرو بيك نيك فالرومبوانات، أييه مكاين لا جراديلا لا مناطق خضراء ولا صفراء كاين رومبوان نتا كالس الولاد كيلعبو والطوموبيلات كيدورو عليك في مشهد عجيب ماتشوفوا غير في هاد المدينة المنكوبة.

إقرأ الخبر من مصدره