احمد الطيب كود الرباط//
فالوقت لي الحكومة خدامة على ملف الاستثمار، وحيداتو من يد الولاة بسباب العراقيل الكثيرة لي كتواجه الاستمثار فبلادنا واللي اعترف بها وسيدنا ودعا الحكومة باش تجاوزها، فهاد السياق كامل، ناض والي فاس لي خصو يمشي فحالو غير على ود واقع هاد المدينة المتردي (سياحيا واقتصاديا واجتماعيا.. شوفو غير طوبيسات والزبل وموت الصناعة التقليدية) كيمنع برلماني يحضر لواحد اللقاء على موضوع الاستثمار وحاضر فيه الوزير المنتدب لدى رئيس الحكومة محسن الجزولي المكلف بملف الاستثمار.
دبا هاد الوالي لي فاشل من أساسو، والواقع والفيديوهات والصفحات ديال هاد المدينة المنهوكة والمنهوبة بلغة التقارير الرسمية وغير الرسمية، ناض كيمنع برلماني لي هو نائب عمدة فاس، للي المكلف بملف الاستثمار فالمجلس الجماعي.
طبعا هاد الواقعة، بغض النظر عن أسباب المنع، خلات واحد العدد من نواب الأمة كيستغربو من هاد المنع، وهاد البرلمانيين لي هضرات معهم “كود” قالو كاملين بلي هادشي كيمسهم وكيمس سمعتهم ومكانتهم الاعتبارية والللي عندهم الصفة ديال مراقبة السياسات العمومية ومساءلتها.
هاد المنع اهانة للبرلمان، وهادشي خلا نواب من الاغلبية والمعارضة يحتجو على هاد الفعل.
قيادي بارز فالبام اعتبر هاد الفعل غير مقبول وتجاوز لأخلاقيات المسؤولية الاعتبارية للولاة، ودبا خاص الولاة يسهلو انتقال سلسل لصلاحيات المراكز الجهوية للاستمار منهم لوزارة الجزولي.
باش تشوفو الغباء ديال هاد الوالي، مشا سد فنادق من بيع مشروبات كحولية، هذا باغي يقتل السياحية لي مقتولة اصلا فهاد المدينة. تصرفات غريبة، بلاصت مايمشي يراقب غير البلايص لي فيهم السرقة والفوضى وينظم الأسواق ويحارب المضاربات.
قصة الحرب على النائب البرلماني عزيز اللبار، مبداتش دبا، كولشي عارف فمناقشة مشروع ميزانية 2023، ناضو عدد من النواب حيحو على وزيرة المالية والوزير المكلف بالميزانية فوزي لقجع كولشي ناض كيتشكا من بعض الولاة والعمال لي كيتدخلو فملفات الاستثمار وكيديرو ليها البلوكاج.
من هاد البرلمانيين كاين اللبار لي وجه انتقادات لاذعة للمسؤولين الإداريين على ملفات الاستثمار، خصوصا الولاة والعمال، متهما جهات بعرقلة الاستثمار، مشككا في قدرة الدولة على تنزيل ميثاق الاستثمار، الذي دعا الملك محمد السادس إلى تنزيله.
وقال اللبار ديك الساعة “وفاس قتلوها الله ياخذ الحق.. وميمكنش نزلو ميثاق الاستثمار والعراقيل الإدارية باقا وكاينا مشاريع متوقفة بلا سبب”.
وأضاف البرلماني اللبار، بأن “هناك مشاريع متوقفة بدون سبب معندها علاقة لا بالعقار ولا بمشاكل إدارية، كاينا عراقيل إدارية..”.
وأفاد اللبار، أنه أثناء مناقشة قانون مالية 2022، قالينا وزير الاقتصاد بأن الرخص ديال الاستثمار تاخد فشهر، قلت لوزير المالية السابق: “واش كتعيشو فالمريخ والسويد راها كاينا مشاريع 4 سنين باش توقفات”.
Laisser un commentaire