وهادوك اللي ورطو الملك فقضية لمجرد خاصهم يتحاسبو. رئيس الدولة ما خاص حتى حد يربط اسمو بمغتصب ومول ديك الفتوى ما لازموش يخرج منها سالم

كود هناء ابو علي ///

ف31 اكتوبر 2016 اي 3 ايام فقط بعد وضع المغني المغتصب سعد لمجرد فسجن “فلوري ميراجيس” الباريسي بعد اتهامه من قبل لورا باغتصابها وضربها بالغرفة 714 بفندق ماريوت الباريسي٬ خرج بيان للسفارة المغربية في باريس. البيان نشراتو وكالة المغرب العربي للانباء وفيه ان الملك محمد السادس “قرر التكلف باتعاب الدفاع” وبللي هاد الشي ف”احترام استقلالية القضاء الفرنسي” وتم تعيين محامي القصر ايريك دوبون موريتي باش يدافع عليه. 

غير هو راه خرجو جوج بيانات. الاولى فيها سيدنا قرر يتكفل باتعاب دفاع لمجرد والثانية حاولات القصاصة تحد من عنف القصاصة الاولى وفيها ان هاد الشي جا استجابة لطلب العائلة. المهم بان باللي القرار الاول تخربيقة وصافي. طبعا بعد فترة غادي ينساحب محامي القصر كاع من القضية قبل ما يولي وزير العدل الفرنسي. لكن اللي بقى محامي ديالو حتى يوم النطق بالحكم البارح 24 فبراير 2023 راه ايرزوك صديق موريتي وعشيرو.

دابا البارح محكمة فباريس حكمات اكدات ان لمجرد مغتصب باش حكمات عليه ب6 سنين سجن ودوز الجمعة اولى لياليه. 

اذن قرار الدفاع عليه من اللول خطأ. قضية بحال هادي ما خاصهاش تكون مرتبطة بالقصر. قضية الاغتصاب فوقت كانت قضية فالمغرب هي قضية الصحافي توفيق بوعشرين. شوفو كيفاش كان التشدد فقضية هاد الصحافي والدفع لهاد المغتصب.

قلناها النهار الاول. لقصر كان خاصو يبقى بعيد فهاد القضية. الدعم ما خاصوش يكون لواحد كاينة شهادات لبنات مغربيات اتاهموه بالعنف والاغتصاب وما قدروش يديرو شكاية كيف تقدمات شكاية فتاة اسمها العلمي فهاد القضية النيت. قدمات شكايتها ف2015 وسحباتها تحت الضغط. 

دابا خاص اللي ورط لقصر يتحاسب. هاداك مول الفتوى ونسبها لسفارة المغرب بباريس ودخل فيها رئيس الدولة٬ خاصو يتحاسب. خاصو يخلص. خاصو يتعاقب. راه خطأ كبير وبزاف. 

إقرأ الخبر من مصدره