سهام البارودي – كود//
الادانة ديال سعد المجرد البارح بست سنين ديال الحبس مورا ماتبتات عليه جريمة الاغتصاب ! فيقات علينا جيوش ديال بوزبال لي كانو ناعسين هادي سبع سنين ! بوزبال لي نهار تشد سعد المجرد ففرانسا خرجوا قاليك باش يديرو وقفة احتجاجية كايغوتو “ليبيغي سعد سعد” و “مايديرهاش” و “آمبوسي ” ! جيوش د الجهال و الحمّاق و المرضى و الميزوجينيين ! بنادم لي كايصحاب بلي جسد المرا جفاف لي جا يمسح فيه رجليه !
انا كانشوف بلي ماشي غي سعد المجرد لي خاصو يتشد ! تاهاد الفنانة و الفنانات ! گاع هادو لي كايبارطاجيو تصاورو و كايتضامنو معاه ! تاهوما خاصهم يتشدو فالحبس بتهمة الاشادة بالاغتصاب ! فحالي كاينة تهمة الاشادة بالارهاب! السيد مجرم و المحكمة تبتات عليه الجريمة بالحجة و الدليل و ففرانسا بلاد فصل السلط! بلاد الحق و القانون د بصح ماشي د بلعاني ! و هاكاك مازال مابغاوش يحشمو ! مازال قاليك ” كلنا سعد ” ايوا راه بصح كلكم سعد ! كلكم مغتصبين ! كلكم حگارة ! كلكم كايصحابكم جسد المرا جفاف لي جا يمسح فيه رجليه !
و انا عاد نقدر نفهم ردة فعل بعض الرجال المغاربة ! لي موالفين يتكرفصو على العيالات و مايطرا ليهم والو ! كانتفهم ردة فعل واحد تال لهنا لهنا وهوا عايش فبلاد الى اغتصب فيها بنت يقدر يتجوج بيها بحكم المحكمة ! كاتجيه صعيبة يشوف بلي الناس فبلادات اخرى كاتشطحك الى تكرفصتي على المرا و لكن لي ماكايتفهمش ليا هوا ردة الفعل ديال شي باطرونات ! عيالات يا حسرة تاهوما قاليك بقا فيهم سعد ! بقا فيهم مغتصب ! و تاهوما كايروجو لديك الهضرة ديال ” و علاش مشات معاه “فحالا صافي غي مشات معاه راه من حقو ينعس معها بزز ! وا شوف على عقلية عند هاد الجاطرونات !
طليناه اخضر معاكم لا عيالات لا رجال ماكاينش ماتهز باللقاط ! كلشي متشبع بثقافة الاغتصاب ! كلشي كايشوف بلي الضحية تستاهل شنو طرا ليها و كلشي بقا فيه ” المجرم ! علاش ؟ حيت بيبيض و زويويون و كايغني الاغاني العاطفية!
و الله الى كون كانت شي جريمة سميتها الاشادة بالاغتصاب فحال الاشادة بالارهاب كورا النص د الفنانة المغاربة غاتلقاهم دابا فالحبس كايونسو حبيبهم سعد !
Laisser un commentaire