نايضة فآسفي بسبب تصريحات المدرب المصري طارق مصطفى اللي طيح من قيمة الأولمبيك وجبد صداع للحيداوي

كود سبور//

خلفت التصريحات ديال المصري طارق مصطفى مدرب أولمبيك آسفي، مؤخرا من بعد ليماتش ديال الفريق المسفيوي فالبطولة الاحترافية جدل كبير وسط مكونات النادي.

تعادل أولمبيك آسفي فآخر ماتش له مع نهضة بركان ضمن الجولة 18 من البطولة الإحترافية، قلق بزاف جماهير أولمبيك آسفي خصوصا وأن المدرب طارق مصطفى خرج من بعدها فالندوة الصحافية واعترف بلي الماتش كان ساهل وأن القرش المسفيوي ضيع 3 بوان.

الغضب ديال مكونات أولمبيك آسفي من المدرب طارق مصطفى وصل للمكتب المسير للفريق من بعدما قال فالندوة الصحافية أن الإمكانيات اللي موفرة له ماشي هي اللي عند الفرق الكبيرة مثل الرجاء والوداد وليفار، وأن أحسن لاعب عندو ما كتفوتش قيمتو 50 أو 60 ألف دولار، وبالمقابل وحسب مصدر مطلع فالرئيس ديال أولمبيك آسفي محمد الحيداوي وفر للمدرب الإمكانيات باش يشتغل وخصص للاعبين بريمات صحاح فكاع الماتشات.

نفس المصدر، كشف أن حديث المدرب طارق مصطفى فالندوة الصحافية على ان الفريق ما عندوش الإمكانيات ديال الفرق الكبيرة، خلى أعضاء من داخل مكتب أولمبيك آسفي يتقلقوا منو وكاين مقربين من الرئيس محمد الحيداوي اللي نصحوه بإقالتو حيث بدا كيشوف أنه ما يقدرش ينافس أكثر على مراكز مقدمة الترتيب وبدا كيدير الأعذار بالإمكانيات اللي مقاتلين هم باش يوفروها للفريق على أساس ينافس على مقدمة الترتيب ماشي يتكلاصا فوسط البطولة، ولكن رئيس النادي ما باغيش يزرب ومتريث لمصلحة الفريق خصوصا فهذه الفترة، وتلقى تصريح المدرب بنية حسنة.

وسبق للمدرب طارق مصطفى خرج قبل أيام خرج بتدوينة ملغومة على الحساب ديالو بموقع التواصل الاجتماعي فيسبوك، قال فيها بالدارجة المصري: “بصراحة أنا إستحملت كثير بما فيه الكفاية”، وهاد التدوينة استغرب لها بزاف من متتبعي أولمبيك آسفي خصوصا وأن إدارة النادي أكدت فشحال من مناسبة أنها كتوفر جميع الظروف لاشتغال المدرب واللاعبين وكتقوم بمجهود باش يكونوا مرتاحين ويقدمو اللي عندهم فالتيران.

إقرأ الخبر من مصدره