القضية دابا وصلات رئاسة النيابة العامة.. البرلماني الحمامي اللي تعدى على صحافي باقي ما استامعو ليه البوليس.. كون كان العكس كون الصحافي استامعو ليه ولا جابوه بالقوة

كود طنجة//

القضية ديال اعتداء البرلماني ورئيس مقاطعة بني مكادة، محمد الحمامي، على مدير موقع “شمالي”، حمزة الوهابي باقة في بلاصتها، حيث باقي ما تم الاستماع للحمامي وخا الاعتداء ديالو موثق بالكاميرا وكاين الشهود وشهادة طبية فيها 22 يوم والصحافي كيعاني دبا من مضاعفات اللكمة اللي وجهها له البرلماني للي تحول لبلطجي، ولكن دبا ولينا كنشجعوه يزيد فيه حيث باقي ما تم الاستماع له.

الصحافي ما سكتش على حقو ورسل شكاية لرئاسة النيابة العامة كيتظلم فيها من تأخر الاستماع للحمامي، وكيشرح حيثيات الاعتداء عليه ومضاعفاتو الصحية، حيث السيد، حسب نص الشكاية اللي حصلات “كود” على نسخة منها، موعت في فمو وولى يوميا كيلوح الدم.

دبا السؤال آشنو خاص بالضبط باش البوليس يستمع لهاذ البرلماني للي ما مسوق وما معبر حتى واحد، واشناهو الميساج لي بغينا نوصلو بهاذ التأخر، واش المغاربة فئات ولا الصحافيين حيط قصير ولا شنو؟

دبا كون كان العكس اللي وقع والصحافي مثلا هو المتهم بالاعتداء كون راه تم الاستماع له ولا ما بغاش يجي، يجيبوه بالقوة.. ولكن هذا غير صحافي ما كاين باس، الكاميرات خسرو والبرلماني ما نستمعوش له، ونستناو السي حمامي غدا يهز شي زرواطة ويدير الصف للصحافيين يربيهم حيث ما عاجبوش داكشي اللي كيكتبو.

إقرأ الخبر من مصدره