محمد سقراط-كود///
المغاربة شعب وسطي، أولا جينا وسط الخريطة ، ما بيضين ما كحلين، الأغلبية قهويين مع تخليطة ديال الأجانب بيضين وكحلين وصفرين وسمرين ديال الحضارات والهجرات لي عرفاها هاد البلاد منذ فجر التاريخ بحكم موقعها جات بين وبين فبنادم فيها حتى هو بين وبين عندنا المغربي الزعر وعينيه زورق بحال شي سويدي وعندنا المغربي الكحل ديال جنوب الصحراء، وحتى الحمش النووي ديالنا مكيخطاش من هاد التخليطة فينا من كل فن طرف والجين الغالب هو الشمال افريقي ديال الأمازيغ، ومخلط بجينات كاع الناس لي حدانا وحتى لي بعاد منا الإنسان راه مهاجر من ديما وكيتنقل وأغلب المغاربة حاليين راه واليديهم أو جدودهم أو جدود جدودهم جاو من بلاصة خرى لهادي فين هوما دابا.
حنا جينا في الوسط بين الغباء والذكاء وبين الزين والخيوبية وبين الطولة والقصورية وبين البيوضة والكحولة حتى الفحولة والقضيب وداكشي ماطويل ماصغير متوسط إحصائيا كأي حاجة خرى، لذا السبيل الوحيد لي عندنا للنهوض بهذه الأمة هو التزاوج مع خير ما في الأجناس الأخرى من أجل تحسين النسل ومحاربة زواج الأقارب، حتى من قبيلة خاصو يتحارب وينتهي راه في الدواور لي متزوج بنت عمو كيتزوج بنت بنت خالو وهي غادا، كتلقى دوار كبير وهوما عبارة على عائلة وحدة شي عمام شي وخوال شي غير جوج جيران كيبقاو يزوجو ولادهم من بعضياتهم لي هوما في الأصل كينحادرو من مؤسس واحد راه حتى هاداك ممنوع.
الصراحة تحية للمرأة المغربية لي مخلات حتى بلاد مامشاتش ليها وتزوجات وحسنات النسل ديال المغاربة خصوصا مع قانون إعطاء الأم الجنسية لولادها ولينا نشوفو مشاهير وعلماء ومدراء كبار كيفتاخرو بتامغرابيت ديالهم لي منحاتها ليهم الأم المغربية المغامرة ، لي الفضول ديالها معندوش الحد والرغبة لي عندها في الإستكشاف خلاتها تختارق مجتمعات كانت مجهولة عند المغاربة ، حتى كتلقى براهش مغاربة زايدين وكابرين تم ومفتاخرين، حيت المغربية لي كتزوج بهندي تقدر شي نهار تولد مدير كوكل والمغربية لي تزوج بكوري تقدر شي نهار تولد بلينا عضو bts والمغربية لي تزوج بمكسيكي تقدر شي نهار تولد لينا إل تشابو والمغربية لي تزوج ببيروفي تقدر تولد لينا كاتب كبير بحال ماريو يجيب نوبل في الأداب للبلاد والمغربية لي تزوج مواكن مالي تقدر تولد لينا آلي فاركا توري راه نهضة هاد الأمة وتطويرها بيد نسائها وحكتهم قدرتهم على إختيار الجينات المناسبة للتزاوج معاها.
Laisser un commentaire