“كود” تنشر حلقات من محاكمة لمجرد. الحلقة الثالثة: لورا قالت بلي ماعمرها بغات المحاكمة تكون مفتوحة للعموم، وكاتحس براسها بحال شي قردة فحديقة دالحيوانات والناس كايتفرجو فيها

تم النشر في “گود” بعد موافقة شخصية من كاتبة الحلقات نهال المنصوري

الجزء التالت :

من بعد ما القاضية سمعات الأقوال ديال لورا، سولاتها علاش ماهرباتش ملي كان سعد كاحيد حوايجو ؟ لورا جاوبات بلي كانت فاللول مصدومة و ماعرفات ما دير قبل ماتستوعب داكشي لي طاري ليها.

لورا رجعات لبلاصتها، عنقاتها مها و بدات كاتبكي.

القاضية طلبات من سعد واش عندو شي تعليق على داكشي لي قالت لورا، قال اللا ماعندو تا تعليق.

سمعو من بعد لـsophrologue ديال لورا لي قالت بلي السيدة تضررات بزاف… بلاما ندخلو فالتفاصيل.

من بعد هاد الكلمة، سعد رجع فهدرتو و بغا يجاوب على داكشي لي قالت لورا. قال أنه ماكانش إيلاج و إلى دار شي حاجة لي ضراتها هو طالب السماحة.

هنا واحد من المحامين ديال سعد تدخل، قال أن لورا باغا تشهر على ضهر سعد و سولها علاش بغات المحاكمة تكون مفتوحة للعموم إلى ماكانش الغرض ديالها هو الشهرة و علاش دارت داك الفيديو لي عاودات فيه شنو طرا

لورا جاوبات بلي هي ماعمرها بغات المحاكمة تكون مفتوحة للعموم، و بلي هادشي مديرونجيها بزاف. بلي كاتحس براسها بحال شي قردة فحديقة د الحيوانات و الناس كايتفرجو فيها و كايسمعوها كاتهدر على حياتها الحميمية و هي كاعما كاتعرفهم و ماعرفاتهمش واش كايساندوها ولا كايتشفاو فيها.

لورا قالت بلي المحامي ديالها هو لي قنعها بلي أقصى عقوبة يقدر ياخد سعد هو أن ناس يسمعوه كايهدر على هادشي و يعرفو القصة الحقيقية و يسمعو الاعترافات ديالو من فمو.

قالت بلي الفيديو فيوتوب دارتو بعد عام و نص ديال السبان و التهديد لي كانت كاتعرضليه يوميا من المغاربة لي ماعارفينش شنو طاري من بعد ما تسربات سميتها و بلي مها و المحامي ديالها قنعوها باش تخرج تعاود القصة ديالها.

يتبع

إقرأ الخبر من مصدره