الوداد بداو كيوجدو لبركان من بعدما استفدو من مكافأة حيث ربحو فيتا كلوب فالعصبة

كود سبور//

غيبدا الوداد الرياضي يوجد للماتش ديالو المقبل أمام نهضة بركان برسم الدورة 19 من منافسات البطولة الإحترافية لكرة القدم، وهو الماتش اللي غيتلعب الثلاثاء الجاي فتيران بركان.

وغيرجعو اللاعبين ديال الوداد الرياضي إلى أجواء التداريب من بعدما كافأهم المدرب كارلوس غاريدو بعطلة ليوم واحد كانت البارح السبت، من أجل الراحة بعد الفوز على فريق فيتا كلوب الكونغولي الجمعة الماضي فعصبة أبطال إفريقيا.

فريق الوداد الرياضي غيستأنف التداريب اليوم الأحد، بإجراء حصة تدريبية فتيران محمد بنجلون بكازا، غيخصصها المدرب كاريدو والطاقم التقني اللي معاه لإزالة العياء عن اللاعبين، ويبداو يوجدوهم للماتش ضد بركان الثلاثاء المقبل فبركان، واللي غيكون فيه ديبلاصمون فالطائرة من كازا إلى وجدة ثم بالحافلة إلى بركان.

وكيتعتبر الماتش ضد نهضة بركان مهم بالنسبة للوداد الرياضي حيث الفريق الأحمر كيطمح يحافظ على نفس فارق النقاط مع المتصدر الجيش الملكي واللي كان 2 نقاط قبل إجراء الجولة 19، حيث ليفار ربحوا وصبح الفارق مؤقتا 5 النقاط.

إقرأ الخبر من مصدره