سامي العلوي -گود //
قريب غادي تبدا بطولة الملك سلمان (ملك السعودية) لي مسمين عليه بطولة العرب هاد العام ديال الأندية، من بعد ما دات الرجاء النسخة لي فاتت ولي كانت مسمية على سيدنا (كأس محمد السادس للأندية العربية).
وموالفة مجموعة أبو ظبي الرياضية الاماراتية هي لكتنقل على البطولة، وكانت “BeIN Sports” القطرية هي لي نقلات هاد البطولة صنف المنتخبات حيت كانت تنظمات فقطر.
النقل التلفزي هاد العام ديال البطولة نايض عليه الشياط، خصوصا ان المغربي بالوداد والرجاء كيعطيو للبطولة رونقة وفرجة وارقام خيالية من حيث المشاهدات، وفالوقت بي ابو ظبي هي لكتنقل هاد العام كاين منافسة.
مصدر ديال “گود” من داخل شبكة “بين سبورتس” القطرية أكد أن الشبكة داخلة للسباق على شراء حقوق بث بطولة سلمان للاندية العربية.
المصدر أكد ان اتحاد إذاعات العرب حتى هما داخلين لهاد السباق باش ياخذو النقل، هاد الشي كيفسر ان البطولة فنسختها الثالثة غادا وكتكبر وكيزيد الاهتمام ديالها.
وغيمثل المغرب فهاد البطولة الوداد والرجاء من كازا والجيش الملكي متصدر البطولة ولي كيحقق نتائج ايجابية فكأس الكونفدرالية الافريقية من العاصمة الرباط .
Laisser un commentaire