كود الرباط//
قال والد الطفلة المغتصبة بإقليم تيفلت، في تصريح لـ”كود”، إنه أحس بالحكرة مرتين، الأولى عندما سمع بتعرض بنتو (طفلة قاصر فعمرها 11 العام)، والثاني عندما نطق القضاء بالحكم على الوحوش الثلاث الذين تناوبوا على اغتصاب بنتو.
وأوضح الأب (محمد خدام في العروبية وكيرعى) لـ”كود” :”هادشي لي وقع فاجأنا وفاجأ الدوار، وجا فسياق مرض الأب ديالي واللي توفا هادي 20 يوم، وخبرني واحد فالسوق بلي بنتي حملت”.
وأضاف الأب في تصريح لـ”كود” من دارو بدوار “الغزاونة” بإقليم تيفلت، “تحكرت، وملي سمعت حكمو عليهم بعام تحكرت كثر، مارضيتش بالحكم والبنت مريضة ومأزمة”.
وتابع بالقول :”جاو عندنا ناس مسؤولين من طرف وزير العدل عبد اللطيف وهبي ومشكور”.
وكشف المتحدث أن المتهمين حاولوا يعطيوه رشوه وهددوه لكنه رفض الخضوع، معلنا تمسكه بالعدالة من إجل إنصاف بنتو.
وأوضح أب الطفلة :”المجرمين قالو داكشي لي غانعطيوك غاندفعوه .. لمن دفعوها الله اعلم”، مضيفا :”بغينا هادوك يتعاقبو بكثر من 5 سنين وكثر من 15 العام”.
وشدد الأب بأن “مكيقدرش يشوف حتى العائلة على هادشي، وهادو لي غايضربو عامين وعام ونص راه غايخرجو وغايعاودو يغتاصبو”.
وكانت غرفة الجنايات الابتدائية بمحكمة الاستئناف بالرباط قد أصدرت، مؤخرا حكم غريب بزاف، كيقضي بعامين دالحبس في حق ثلاثة أشخاص كتتراوح أعمارهم ما بين 25 و32 و37 عام، “تناوبوا على اغتصاب بنيتة فعمرها11 العام، وتتحدر من نواحي مدينة تيفلت التابعة لإقليم (محافظة) الخميسات”.
هاد القضاة للي حكمو بهاد الحكم خصهم يتعزلو. فضيحة لصورة القضاء فبلادنا، وفضيحة لشعارات المملكة فمجال حقوق المرأة والأطفال. وشوهة ما بعدها شوهة لمغرب 2023.