المقدم في الثقافة الشعبية رمز لتاشكامت والحكرة والرشوة ونهار كيسلخو شي واحد أو يتيري فيه كتلقى تعليقات المغاربة فرحانين للخبر واخا كورونا كانت مناسبة باش تحسن الداخلية صورة أعوانها عند المغاربة إلا أنه وقع العكس وزادت ترسخات داك الصورة

محمد سقراط-كود///

قبل أيام داز واحد الخبر في كود ديال شي واحد في الرباط سلخ واحد المقدم مزيان، مواطن سلخ عون سلطة هادي جريمة وغادي يعاقبو القانون عليها، ولكن في التعليقات على الخبر كانو الناس فرحانين وكيعتابروه بطل حيت سلخ مقدم حيت بالنسبة ليهم المقدمية غير ديال السليخ وأي واحد فايت واقع ليه شي فلاش مع المقدم خصوصا سكان الأحياء الشعبية فين المقدم هو ممثل الدولة الأقوى من بعد القايد وسيدنا والله وطبعا، ومن بعدها بشوية بوليسي في مراكش خرج تيرا بالقرطاس في مقدم وشيخ وقايد ومخازني كاع تجمع قوى الشر بالنسبة للعديد من المغاربة خرج تيرا فيهم هاد البوليسي لي دار جريمة كبيرة وخرج على حياتو وحياة ولادو وضحاياه من رجال السلطة وأعوانها، وواخا هاد البوليسي كان باغي يكحش النص في واحد الزنقة ويشركها مع الصالون، وهذا سلوك شائع في السكن الإقتصادي لي حداه شي ركنة خاوية كيدور عليها حيط ويزيدها للكوزينة، ومع ذلك تعاطفو معاه الناس بدعوى أن كولشي دار داكشي لي بغا يدير البوليسي والمقدم والقايد غير حكرو عليه علاش مامشاوش عند لخريين.

المقدم في الثقافة الشعبية رمز لتاشكامت والحكرة والرشوة والتخوفيشى وانعدام الاخلاق والضمير والبيع والشرا في الحيين والميتين، طبعا هذا تعميم مجحف في حق العديد من المقدمية لي الله يعمرها دار، وفي حق العديد من الشباب لي دخلوا لهاد المهنة وكيأديو الواجب ديالهم بكل مهنية وأخلاق وشبعة وكيحاولوا يكونوا موضوعيين على قدر جهدهم وإمكانياتهم طبعا، ولكن عموما المغاربة كيعتابرو المقدم آفة النظام لي ممحتاجينش ليها وكتزيد غير ترسخ الفساد والظلم والرشوة والمحسوبية، وهو من ركائز الفساد اليومي لي كيظطرو يتعايشو معاه، وخصوصا في الأحياء الشعبية فين البناء العشوائي والبرارك والأمية والكرارص والبناء بدون رخصة والإستفادة من المساعدات وقفة رمضان ومليون محفظة ومنعرف شنو هادي البيئة فين كينتاعش المقدم صحاب الفيلات معندو مايدير بيهم.

و واخا جات كورونا ولي كانت فرصة للداخلية فين تحسن صورتها وكيف شفنا فيديوات القايدة حورية شفنا فيديو القايد لي كيفرق المسمن على شباب في عمر الزهور خارج يتبوق، ووكيف شفنا المقدم ديال دوار ولاد عياد وخطبته الشهيرة عشنا وشفنا مقدمية كيبيعو رخصة التنقل ويبزنزو في المساعدات ويعكسو للناس أمورها وتزادت سلطتهم وتسلطهم ، بينما في الواقع راه كانت فرصة ذهبية لمصالحة الشعب مع رجال السلطة و أعوانها لكن للأسف ضاعت بسباب الجشع وإنعدام الأخلاق وموت الضمير وبكاع السلوكات لي كتميزنا كمغاربة غير معندنا سلطة فين نمارسوها وصافي ولكن راه كتلقاها حتى فسانديك ديال عمارة وفي سيكوريتي ديال سبيطار وهادشي لي مخلي خبر ديال بوليسي تيرا بالقرطاس على مقدم خبر مفرح لبعض المغاربة.

إقرأ الخبر من مصدره