سهام البارودي- كود//
سعد الدين العثماني من بعد ماسالات لاميسيون ديالو كرئيس حكومة رجع للكابيني ديالو و هادي حاجة مزيانة انا بعدا كانحتارم السياسين لي عندهم شي ميتيي آخر من غير السياسة كاياكلو بيه الخبز و ماعنديش اي احترام لأي واحد كايدير السياسة باش ينصب الگاميلة فدارو !
ولكن وانا كانتفرج فالڤيديو ديال العثماني الجديد على رمضان و الصوم ! بقيت كانقول مع راسي كيفاش هاد السيد كان واحد النهار رئيس حكومة ؟! ڤيديو عامر بالتناقضات و باغي يدوزهم صحّة حيت لابس الطابلية ديال الطبيب ( بالمناسبة العثماني طبيب نفسي ماشي اختصاصي فالطب الباطني و لا كارديولوگ و لا اختصاصي فالسكري ! طبيب نفسي كايفهم علينا فرمضان و فوائد الصوم و قاليك ماتأخروش الفطور ! عنداكم تأخرو الفطور فحالا ماعارفش بلي الاغلبية د المغاربة مع كايقول الفقيه الله اكبر مع كايجغطو الجغطة الاولى د الحريرة ! شكون كايعطّل الفطور آ سّي العثماني ؟! لاواه خاصكم ماتسهروش و خاصكم تأخرو السحور و كي غانديرو ليها هادي ؟! نعسو بكري و نفيقو نتسحرو اشمن جهد واشمن شهية غاتكون عند الانسان لي فطر و نعس و فاق ياكل مع النصاصات د الليل ! آشمن فوائد غايكونو لاكان الجسم محتاج للما ؟
گاع المغاربة عارفين بلي رمضان موسم النعاس و العصير و كاين لي كايديرو سبة فالادارات و الشركات للخمول و النسيان و الخدمة العوجة و راني صايم و سير تال مورا رمضان واجي … كلشي عارف بلي رمضان موسم المضاربات و الترمضينة و مال مّو بنادم ؟
و موسم التصرفات اللاحضارية و سير تصلي و حط طوموبيلتك وسط الشاريع بلوكي الطوموبيلات الاخرين ! و سير تصلي و ريزيرڤي خمسة د البلايص القدام لصحابك و عائلتك …
گاع المغاربة قاريين الفيلم د رمضان و عارفينو باش منفوخ ! و العثماني عاد باغي يشرح لينا فوائد الصيام و كيفاش خاصنا نصومو فحالا المغربي راهب من دوك الرهبان ديال التيبيت لي موالفين بالصوم الطويل و اليوگا و لونطريما !