محمد سقراط-كود///
بالله عليكم كيف لمغربي ولد فاس أو الراشيدية أوز مكناس أو العديد من المدن المنسية أن تسول له نفسه يدير وقفة أو مسيرة أو مظاهرة تضامنا مع فلسطين، مسيرات مليونية كانوا كيتنظموا في الرباط تضامنا مع غزة وهي غير دورة في مدينة بحال فاس خاص المغاربة كلهم يديرو مسيرات تضامنية معاها، أو واحد في تازة مثلا وعايش متقل بالهم النضالي والتضامني مع فلسطين، واش فلسطين قضية إحتلال وتشريد شعب طبعا آه، ولكن واش القضية الفلسطينية أولى من الوطن طبعا لا، خاص الواحد يمشي بالعواط راه لا يعقل أن هاد الكم الكبير ديال المشاريع التنموية يبقى حبيس الساحل المغربي ومتمركز بين طنجة وكازا وباقي المغرب منسي و واكل لعصى.
شارع محمد الخامس لي كان واحد من أهم الشوارع في مدينة فاس بحال أي شارع محمد الخامس في المغرب كامل، سنوات هادي وهو في الإصلاح في اللخر النتيجة غير طريق وطروطوار عادي بحال لي كاين في حومة الحداد في طنجة أو لي داير بجبل الرايسي في الرباط ، هاد اليوماين دزت منو لقيتو بحال شي شارع فشي حضارة آلت الى الزوال، القضية ناشفة الرواج مقتول، والعديد من المحلات علقوا للبيع وآخرون سدون في مرة وحدة، من شارع تاريخي عريق ديال المدينة الجديدة لزقاق محشر ناسو كيهربو منو بحال الى في ووهان أيام كورونا، هادي هي نتيجة الإصلاح لي ستغرق سنوات، عوض يرد الشارع للأحسن كفسها عليه وقتلوا نهائيا من أغلب الأنشطة التجارية لي كانت فيه واش جريمة بحال هادي ماستحقش مظاهرة ومسيرة وإحتجاجات تضامنية مع فاس المنكوبة عوض يخرجوا الناس في فاس تضامنا مع فلسطين.
قيسارية الكفاح مثلا لي هي قيسارية تاريخية ومن أهم أسواق المدينة القديمة هاد المركز التجاري عرف إصلاحات من بعد الزيارة الملكية وهادوك الإصلاحات تعطلوا بزاف بزاف حتى التجار لي كانوا فيها خرجوا دارو محلات برا وكل واحد شنو دار بيه الله فاش فتحات القيسارية كان كولشي نساها حتى واش كاينة وراه واحد الربع ديال المحلات أو كثر غير مسدود دابا، التطوير ديال الأماكن في العالم كيردها حسن وأفضل وكيخلق فيها رواج إلا مدينة فاس، طنجة والرباط تم تأهيل المدن العتيقة ديالهم ولاو زوينين وسياحيين والمغاربة والعالم تبهرو بيهم إلا فاش كيوقع التطوير والإصلاح في هاتد المدينة داك الساعة كتمشي الأمور بالعكس والنتيجة كتكون الكساد وضياع رزقف الدولة ورزق عباد الله، ورغم هاد المصائب كلها عمر شي حد في المغرب أو خارجه دار وقفة تضامنية مع مدينة فاس المنكوبة بل فواسا هوما لي كتلقاهم متضامنين مع كاع قضايا الكون وناسيين قضيتهم الأساسية لي هي مدينتهم فين عايشين.