شي واحد يقول لحسن الفذ بلّي صافي! لا يلاها يالله ! راك عصرّتي الشخصية ديال كبّور حتى مابقاتش فيها نقطة د الزّيت ! استهلكتيها ! درتي بيها الكوميديا ! درتي بيها الاشهار ! الوان مان شو و درتي بيها الفلوس حتى حماضت و بسالت شنو مازال باغي دير بيها؟! سير خود ليك شي عطلة باش تقدر ترجع تبدع !

سهام البارودي – كود//

كبور واش مشيتي للدار؟
اينا دار ؟
دارك
دارك ؟
اه دارك
اشنو غاندير فدارك ؟
وا لا دارك تّا
طارارارا طاراراران ( سالا المشهد الاول)

كبور واش تبغي تغدا ؟
شنو نتغدا ؟
داكشي لي مطيبة
و علاش مانتغداوش بداكشي لي مطيب انا ؟
شنو مطيب تّا ؟
ماعرفتش !
وا شوف تّا
وا  شوفي تّي
لا شوف تّا
لا شوفي تّي
طارارارا طاراران ( سالا  المشهد الثاني)

كبّور فيق ؟
اههه
فيق راه دخلو الشفارة !
اينا شفارة !
سيري تّي ! لا سير تّا ! لا سيري تّي ! لا سير تّا !
طاراراران طاراران ( سالا المشهد الثالت) و سالات الحلقة د كبّور !

هاكّا دايرين تقريبا گاع المشاهد هاد العام ديال مسلسل “كبّور” و لي السمية ديالو الجديدة ديال هاد العام “مادام سميرس ” ! حوار حامض و باسل و مافيهش حتى شي گاگ ! كبّور غا كايخرج فعينيه و فتيحة غا كاتغوت وتجعوق فالتلفزة!  و خاصك تفرج فعشرة ديال الحلقات عاد طّيح فشي نويطة من النويطات لي يمكن يضحكوك !

انا كمتفرجة و كفان كبيرة ديال حسن الفذ من يّامات “شنو بغيتي تكوني ؟” “بغيت نكون مجاوجة” و موراها الشانيلي تيڤي من قبل مايتعاطى الفذ لكوميديا ” كبّور ” كايجيني هادشي لي كانشوف هاد العام من افشل و احمض مادار الفذ فالمشوار ديالو الفني ( من مورا داك السلسلة لي كان دار مع نرجس الحلاق و لي تاهي كانت حامضة) كان غادي طالع طالع طالع واخا بشوية و لكن كان غادي مزيان و دابا كايبان ليا كايدير سقطة حرّة ! صافي باراكا عليك آ سي الفذ ! هذا لله ! انا معاك بالله و بالشرع ! دخلت عليك بالله لاما باراكا من شخصية كبّور راك حمضتيها و بسلتيها و كيما وصلتي بيها لقمة الشهرة و النجومية و النجاح ! راه دابا كاتحفر بيها فأعماق الحضيض !

الفذ فنان ذكي هادي مايحيدها ليه حتى واحد ! و صرع شخصية كبّور العروبي الشلاهبي القوالبي… وضحكني بيها و ضحك بيها بزاف د المغاربة و دار بيها كلشي ! الكوميديا ، الاشهار ، الوان مان شو ، و دار بيها الفلوس بزاف ! الله يجعل البركة! راه شخصية كبّور اتستهلكات ! و ملّيت منها و ملّو منها بزاف د النّاس !

ولكن الفذ راسو قاصح و ليگو عندو منفوخ و خصوصا ماكايرضاش يسمع هادشي ! باغي يبقى بزز ! واش ماراضيش يحبس ؟! واش تشير بشخصية كبّور ؟! واش مابقاش عندو الابداع ؟! الالهام لي يخلق بيه شخصية جديدة ؟! الله اعلم ! انا بعدا كايبان ليا بلي خاصو يمشي يعطي لراسو الراحة و يتصنط لعظامو ع الله و عسى يقدر يخلق شي فكرة جديدة ناجحة يرجع بيها و ديك الساعة لابغا يعتازل يعتازل بعزّو ! ماشي تامرمد و تمرمد بهاد الشخصية د كبّور !

إقرأ الخبر من مصدره