بايتاس عبء كبير علي الحكومة. فشل باش يكون ناطق رسمي وفشل فالتواصل مع لمغاربة وفشل فالتعامل مع الصحافة

كود هناء ابو علي ////

مصطفى بايتاس الوزير المنتدب المكلف بالعلاقات مع البرلمان فشل فالمهمة اللي جا على قبالها: “ناطق رسمي باسم الحكومة”. كل اسبوع كيزيد يؤكد هاد الشي. كيزيد يبين ضعفو فالندوات الاسبوعية بعد المجلس الحكومي. ولات هاد الندوات بشحال شي كومبا مع الصحافيين. ما كيجاوبش على الاسئلة. كيتجاهل شي اسئلة ديال شي صحافيين. ماشي مؤدب فالرد على بعض الاسئلة. كيغضب بحال ايلى ماشي واجهة للحكومة.

كلشي بدا بتعيين هاد السياسي التجمعي فمنصب حساس ومهم بزاف اي الناطق الرسمي باسم الحكومة. كانت ناقصة بايتاس التجربة. كان يعتاقد باللي المنصب تجربة ماشي بهاد التعقيد.

نرجعو للناس للي خدمو ليه. عدم استقرار الديوان ديالو دليل على المشاكل اللي كيعيشها. جاب عدد من المتخصصين فالتواصل منهم صحافيين وصحافيات من المعهد العالي للاعلام والاتصال اللي كيخرجو منو كفاءات مزيانة. لكن ما كانوش كيطولو. جاب ناس عندهم التجربة فالتواصل. كان كيبدل الفرقة. مستشار خدام معاه قال ل”كود” باللي كاينة مشكلة فالفرقة اللي خدام فيها. جاب متخصصين اه وجاب شي وحدين من الحزب دوزو شي تجربة قصيرة فالتواصل وكيعتاقدو باللي ولاو خبرا. “.كيكون عندنا اجتماع فيه 4 . تصور كيكون واحد يهدر والباقي حاضيين اللي كيهدر. خايفين يتسلق فالحزب ويفوتهم فالشبيبة او فالتجمع. المشكلة انو عارف هاد الشي ومخليه” يحكي مصدر “كود”.

باش يكون عندك ناطق رسمي اصلا ضعيف ومعاه مستشارين ومستشارات حاضيين بعضياتهم عوض ما يحضيو خدمتهم. راه مشكل كبير والنتيحة كتبان فالندوات الصحافية.

لكن علاش وصلات لهاد المستوى هاد الندوات؟ من الخيمة خرج مايل مع بايتاس. اول مرة جاب وكالة مختصة ودار اولى الندوات الصحافية فمكتبو. تبين ليه فشل هاد الشي. الندوات الصحافية للحكومة ماشي لعب. خاصها فرقة من الديوان تشرف عليها. بعد ذلك تخلى على الوكالة ومشى لوكالة المغرب العربي للانباء كيف دارو اللي سبقوه.  فمرحلة كانت الندوات مزيان. كيجي وكيجيب معاه وزير القطاع اللي  داير الحدث. “كانت حتى الخدمة مزيانة فالديوان. كنوجدو كاع الاحتمالات اللي ممكن يطرحوها الصحافيين فالندوة وكنوجدو للوزير الاجابات حسب القطاعات” يحكي مصدر “كود”. فهاد المرحلة كان ممكن لمستشار يتاصل ببعض الصحافيين يسولهم على الاسئلة اللي يمكن يطرحوها باش تكون الاجابات موجودة. لكن واش هادا ماشي تدخل فخدمة الصحافي؟
“ماشي تدخل فخدمة الصحافي٬ بالعكس كانت احترام لخدمتو. باش يسول خاص الوزير يكون موجد” يرد مصدر “كود”.
اليوم كلشي تبدل.

فتحقيق نشراتو “اليوم 24” السيمانا اللي فاتت فيه انو ف50 ندوة دارها بايباس من نهار تعين حتى نهاية 2022 ما جاوبش على عدد من الاسئلة. 26 بالمائة من الاسئلة المطروحة كتبقى بلا رد اي 201 سؤال. اليومية الالكترونية وضحات باللي قطاع الخارجية كيجي فالمرتبة الاولى اللي ما كيجاوبش عليه الوزير بنسبة 20 بالمائة. ايلى كانت بعض هاد الاسئلة اللي كتهم الخارجية ماشي كلها يقدر يبرر لوزير عدم الاجابة فكيفاش ما كيجاوبش على اسئلة بحال ارتفاع الاسعار. راه 8 بالمائة من هاد الاسئلة ما تسوقش ليها لوزير.

المثير فهاد التحقيق كذلك ان بايتاس كيتعامل مع الصحافيين بعقلية غريبة. كاين اللي كيجاوب على اسئلتو وكاين اللي ما كيتسوقش ليه. ف3 صحافيين من 8 الاكثر طرحا للاسئلة٬ ما تلقاوش اجابات بنسب تتراوح ما بين 38 و50 بالمائة. اللي متبع الندوات الصحافية غادي يعرف مثلا ان بايتاس ما كيجاوبش على اسئلة هشام اعناجي صحافي كود فالرباط ولا على اسئلة صحافيين اخرين. ما كيتسوقش لاسئلتو. بعض المرات باش كيكون كيسول ما كيشوفش فيه گاع. بحال ايلى ضرتو. فيما هو صحافي ولاخر سياسي.

باش سولنا وزير فالحكومة على التواصل٬ كان واضح وكود.”عندنا مشكلة كبيرة فيه”.

دابا كيفاش فملف الاسعار الحكومة كانت ضعيفة دافع على راسها. حقاش بايتاس كان ضعيف. كيتهرب وما كيقدمش الاجوبة بطريقة يفهمها المغربي. هاد الشي خلى الطريق لخضوم الحكومة باش يتباوردو.

“الحكومة دارت خدمة مزيانة. شوفو غير وكالة التصنيف الائتماني “ستاندار اند بورز” اش قالت علي اقتصاد بلادنا هادي ايام. “خانة مستقرة” “الاصلاحات كتفتح الطريق تدريجيا لاقتصاد اندماجي” والاقتصاد المغربي واجه صدمات جهوية ودولية وزيد وزيد. هاد الشي يضيف مصدر “كود” ما تمش استثمارو فوقتو وبطريقة فعالة من قبلنا فالحكومة. اي كاين مشكلة فالتواصل.

دابا كيفاش وكالة للتصنيف الائتماني كيدافع بالارقام على حكومة اخنوش فيما المكلف بهاد الشي ما قدرش يديرها. “كاين ايجابيات كثيرة كيديرها الحكومة ولكن ما عارفينش نوصلوها للمواطن” يستغرب مصدر “كود” الحكومي.

ربما هاد الضعف هو اللي خلى وزراء فالحكومة ما بقاوش يحضرو مع الناطق الرسمي فالندوات. هاد الطريقة كانت فعالة وكتغطي على ضعف بايتاس. كل سيمانا كان كيجي وزير معني بالقطاع اللي داير الحدث وكيجاوب على اسئلة الصحافيين فالندوة الاسبوعية. فهاد الندوات شفنا كيفاش مثلا فوزي لقجع الوزير المنتدب المكلف بالميزانية باش كيحضر كيولي بايتاس تلميذ كيشوف استاذو كيفاش كيهدر.

دابا بايتاس ولى مشكلة للحكومة عوض ما يكون واجهة للدفاع عليها. ضيع جهدو فالخوا الخاوي وما طورش راسو. استمرارو فهاد الحكومة ماشي فصالحها. خاص ناطق رسمي سياسي طبعا ومقنع فاجاباتو ورزين فتدخلاتو.

إقرأ الخبر من مصدره